Sheshi "Veliera", përleshen 2 grupe protestuesish, 10 persona të plagosur
Policia: Sherri nisi për stemat e PD- së. Bylykbashi: Të rinjtë u futën nga Rama Konflikti mes Lëvizjes Studentore e Shoqërisë Civile
Protesta e radhës kundër projektit të sheshit "Ve liera" në Durrës ka degjeneruar në përleshje, ndërsa pas përplasjes, policia ka shoqëruar 8 persona dhe ka nisur procedimin penal në gjendje të lirë për disa prej tyre. Ashtu siç ishte paralajmëruar, në orën 22: 00 të së enjtes, përfaqësues Shoqërisë Civile ( rreth 50 veta) janë mbledhur në tubim paras Torrës Veneciane. Protestuesit që përfaqësoheshin nga ambientalisti i njohur Sazan Guri kishin vendosur që ta gdhinin natën jashtë, por nuk ka ndodhur kështu, pasi protesta ka dështuar. Mësohet se rreth orës 23: 30, grupimit të Shoqërisë Civile i janë bashkuar edhe disa studentë (" Lëvizja Studentore e formuar për mbrojtjen e sistemit të vlerave dhe kundërshtimin e pseudo- shtetarëve") që përfaqësoheshin nga Edian Kulluri. Fillimisht të dy grupimet deklaruan se janë të vendosur për të vijuar protestat e tyre në mbrojtje të trashëgimisë arkeologjike të qytetit bregdetar, që sipas tyre po shkatërrohet nga kryebashkiaku Vangjush Dako. Ata improvizuan edhe disa stola para Torrës Veneciane. Por, dy orë pasi kishte nisur protesta midis dy grupimeve nisi një konflikt, që degjeneroi deri në përplasje fizike midis tyre. Si pasojë e përleshjes, 10 persona kanë përfunduar në spitalin e Durrësit, ku dhe kanë marrë ndihmën e parë mjekësore. Pas sinjalizimit për përleshjen, blutë kanë shkuar në vendngjarje dhe kanë nisur hetimet. Burime zyrtare nga Drejtoria e Policisë së Qarkut të Durrësit dje bënë me dije se konflikti mes protestuesve ka marrë shkas nga parullat politike dhe stemat e bluzave dhe të kapeleve me logo të PDsë të përfaqësuesve të Shoqërisë Civile. Ndërkohë, konflikti ka bërë që të dështojë protesta. Pas ngjarjes ka reaguar kreu i PD- së së Durrësit, Oerd Bylykbashi. Ai deklaroi dje se kanë qenë disa persona të infiltruar nga kryeministri Rama, që sulmuan dhe rrahën barbarisht mbrëmjen e së enjtes protestuesit e shoqërisë civile.
POLICIA
"Përfaqësues Shoqërisë Civile kanë hedhur parulla pro
PD dhe kjo nuk është pritur mirë nga ana e grupimit tjetër. Këta të fundit ( studentët) kanë kërkuar që protesta të mos politizohej, por protestuesit e Sazan Gurit kanë vijuar duke u bërë shkak për sherrin mes palëve", thanë blutë. Po sipas policisë, janë shoqëruar dhe marrë në pyetje një numër i madh personash, pasi u dërguan në spital të lënduar dhe se është duke dokumentuar të gjithë sherrin e ndodhur. "Protestuesit do të kalonin natën para Sheshit të Torrës Veneciane dhe në orën 08: 00 të datës 17.03.2017 do të drejtoheshin drejt bashkisë dhe deri në orën 09: 00 do
të protestonin para shkallëve të Bashkisë Durrës. Protesta zhvillohej nga Shoqëria Civile, të cilët kanë kërkuar për mbështetje një grup studentësh ' Lëvizja Studentore e formuar për mbrojtjen e sistemit të vlerave dhe kundërshtimin e pseudo- shtetarëve' në funksion të kundërshtimit të projektit ' Veliera'. Protesta ka nisur në orën e caktuar dhe ka vijuar në mënyrë paqësore, kur në orën 22: 30 midis dy grupeve të mësipërme ka nisur një konflikt. Lëvizja Studentore pretendon se nuk është përmbajtur kushti që ato kishin rënë dakord, sipas të cilëve, në protestë nuk do
të kishte thirrje politike. Ata pretendojnë se Shoqëria Civile ka pasur veshje me stema dhe emblema të Partisë Demokratike ( bluza dhe kapele). Konflikti ka nisur midis shtetasve A. J. 29 vjeçe, banuese në Elbasan dhe L. B. 35 vjeç, banues në Tiranë, pjesë të Shoqërisë Civile dhe shtetasve E. K. 33 vjeç e G. J. 25 vjeç, banues në Tiranë, pjesë e Lëvizjes Studentore. Shtetasit e mësipërm kanë marrë dëmtime të lehta dhe pas ndihmës mjekësore në Spitalin Rajonal Durrës janë pyetur mbi rrethanat në të cilat ka ndodhur konflikti. Nga veprimet e para hetimore në ngarkim të shtetasve të mësipërm ka nisur procedimi penal në gjendje të lirë dhe materialet për veprime të mëtejshme janë referuar në Prokurorinë e Rrethit Gjyqësor Durrës për veprën penale "Dëmtime të tjera me dashje", thuhej në njoftimin e policisë së Durrësit.