Skënderbeu e Kukësi barazojnë, ' qesh' Partizani
Verilindorët ruajnë vendin e parë, por mund të arrihen nga të kuqtë nëse këta thyejnë Korabin Latifi dhe Kale, autorët e golave në kryendeshje
Skënderbeu i gëzohet para kohe rezultatit në ndeshjen me Kukësin dhe në atë moment shpërqendrimi verilindorët e ndëshkojnë, duke marrë një barazim të artë në një sfidë, ku dukej se do të pësonin humbjen e parë në kampionat. Gjithçka falë një fillimi të vrullshëm të kampionëve, të cilët në minutën e 12- të e shohin veten në avantazh falë lojtarit të tyre të momentit, Liridon Latifit, që me një të djathtë kirurgjikale mposht Koliçin për kënaqësinë e tifozëve vendës. Klas në veprim dhe kirurgjikal në ekzekutim. Skemat speciale të përgatitura nga Gjoka në goditjet standarde nuk mjaftuan. Liridon Latifi ishte ylli i mbrëmjes në Korçë. I jashtëzakonshëm në krijimin e zonave, vrapim dhe driblime. Shkëndija e sulmuesit të Kombëtares në të 27'- ën i krijoi shansin e artë Hamdi Salihit për të dyfishuar. Shtylla prishi festën e bomberit shkodran, që luajti me injeksione dhe ndoshta e meritonte golin për sakrificën. Kukësi provoi të përgjigjej me Pejiç, që bëri gjithçka mirë në zonë, por gaboi në goditje, ndërsa në anën tjetër të fushës Koliçi fillimisht neutralizoi tentativën e Predeskut, ndërsa pak çaste më pas u shpëtua nga traversa në devijimin me kokë të Salihit. Pjesa e dytë e lojës solli këmbënguljen e Kukësit, që nuk u dorëzua, por provoi në të gjitha mënyrat të shënonte. Në një duel spektakolar, nuk mund të mungonin edhe vendimet e diskutueshme të arbitrave. Nga pozicioni i dyshimtë jashtë loje i Pejiç, te 11- metërshi i pretenduar nga korçarët pas depërtimit të Latifit, që u rrëzua në zonë pas duelit me Allën, ndërsa gjyqtari Meta vazhdoi lojën. E ndërsa Karioka vendosi në provë reaktivitetin e Shehit, edhe kuksianët kishin pretendimet e tyre për penallti me Elton Kale, që i aktivizuar nga stoli, rezultoi vendimtar. Një tjetër moment i debatuar ishte ai i minutës së 87- të, me parullën e tifozëve të Skënderbeut, të cilët "falënderonin Kukësin që e kishte ruajtur virgjërinë" deri në këtë sfidë. Por deri në minutën e 89- të, atëherë kur spondi me kokë i Shametit do të nxjerrë të lirë brazilianin Kale, që me një goditje të shkëlqyer do të thyejë Shehin dhe do t'u japë verilindorëve pikën që do t'i mbajë të vetëm në krye, ndërsa Partizani do të ketë mundësinë e artë të barazojë Kukësin në majë të tabelës, nëse mposht këtë të shtunë Korabin.