Ekzekutoi 2 vëllezër për kromin, burg përjetë Muharrem Burgjishës
Autori i masakrës së 25 korrikut 2014 pretendoi se ishte i sëmurë mendor Plagosi edhe djalin 16- vjeçar të njërit prej viktimave
Gjykata e Kukësit ka dënuar me burgim të përjetshëm shtetasin Muharrem Bugjisha, i cili akuzohet nga Prokuroria për vrasjen me armë të vëllezërve: Emri dhe Bilbil Batusha, si edhe plagosjen e Arbër Batushës, pas një konflikti verbal mes tyre, lidhur me përdorimin e një hapësire tokë krommbajtëse në fshatin Kalimash. Ngjarja ka ndodhur mesditën e datës 25.07.2014 dhe nga hetimet e Prokurorisë rezultoi se i akuzuari Bugjisha, në vijim të një debati verbal, ka qëlluar 7 herë me pistoletë, nga të cilat ka mbetur i vdekur në vend 45- vjeçari Emri Batusha, ndërkohë që është plagosur rëndë dhe ka vdekur rrugës për në spital, 30vjeçari Bilbil Batusha. Ndërkohë, nga plumbat ka mbetur i plagosur edhe 16vjeçari Arbër Batusha ( djali i Emriut). Pas krimit, i akuzuari është larguar dhe gjatë periudhës së hetimit nuk është bërë i mundur arrestimi i tij. Autori i akuzuar është vetëdorëzuar në kohën kur Prokuroria e Kukësit dërgoi kërkesën për gjykim ndaj tij për veprat penale të "Vrasjes në rrethana të tjera cilësuese" dhe "Mbajtje pa leje e armëve luftarake". Gjatë gjykimit, i pandehuri Muharrem Burgjisha dhe mbrojtja e tij kanë pretenduar se ai ( Burgjisha) ka pasur probleme me shëndetin mendor si në kohën e kryerjes së krimit, po ashtu edhe në periudhën në vijim. Pas kryerjes së ekspertizave ligjore, është konkluduar se i pandehuri nuk ka probleme të shëndetit mendor dhe se ai e ka kryer krimin në vijim të konflikti për të ndarë zonat e kërkimit të kromit në minierën e Kalimashit. Në përfundim të procesit gjyqësor, gjykata pranoi kërkesën e Prokurorisë së Kukësit dhe dënoi me burgim të përjetshëm të pandehurin.
ARRESTIMI I AUTORIT TË MASAKRËS
Më 17 janar të vitit 2015, Policia e Shtetit arrestoi autorin e masakrës së ndodhur në korrik të vitit 2014 në Kalimash të Kukësit, ku u mbetën të vrarë dy vëllezërit Emri dhe Bilbil Batusha. Muharrem Burgjisha kërkohej prej muajsh nga forcat e rendit, të cilët bënë të mundur kapjen e tij në qytetin e Laçit. Nga hetimet e kryera dyshohet se gjithçka ndodhi pas një sherri për kromin në minierën e Kalimashit. Sipas dëshmitarëve, para krimit, autori Muharrem Burgjisha dhe dy vëllezërit Emri dhe Bilbil Batusha janë konfliktuar fizikisht, duke ushtruar dhunë fizike mbi 45- vjeçarin Batusha. Ky i fundit më pas është larguar duke u rikthyer sërish në stoqet e kromit, ku këtë herë me vete kishte edhe një armë zjarri tip kallashnikov. Me këtë të fundit ka qëlluar mbi dy vëllezërit Batusha, duke lënë fillimisht të vdekur në vend Emri Batushën dhe plagosur rëndë vëllain e tij Bilbilin dhe djalin 16- vjeçar Arbër Batushën. Pas kryerjes së hetimeve paraprake u deklarua se konflikti kishte nisur për pronësinë e një galerie kromi, e cila pretendohej nga të dyja palët. Mësohet se 2 vëllezërit Batusha dhe autori i vrasjes Burgjisha kanë qenë ortakë dikur. Nisja e bashkëpunimit të vrasësit me një tjetër person ka qenë zanafilla e konfliktit mes palëve. Fillimisht nga të shtënat Bilbil Batusha mbeti i plagosur dhe u dërgua në Tiranë në gjendje të rëndë, por rreth orës 20: 30 të 25 korrikut, ai ndërroi jetë për shkak të plagëve të rënda të marra në ngjarje.