Strasburgu rrëzon 3 kandidaturat e qeverisë
Gjykata kërkon propozime të reja nga Shqipëria
Refuzohen
sërish kandi daturat e qeverisë shqiptare për Gjykatën e Strasburgut. Asambleja Parlamentare e Këshillit të Europës refuzoi për herë të dytë tre kandidaturat e qeverisë shqiptare për gjyqtarë në Gjykatën Europiane të të Drejtave të Njeriut, për shkak të mungesës së kualifikimit. Komisioni i GJEDNJ intervistoi kandidatët më 6 prill 2017 dhe rekomandoi që kjo listë të refuzohet, teksa kërkoi emra të rinj kandidatësh për gjyqtarë. Tre kandidaturat e rrëzuara, Aurela Anastasi, Sokol Berberi dhe Aleksandër Muskaj, u morën në shqyrtim nga Komiteti për zgjedhjen e gjyqtarëve në gjykatën e Strasburgut. Në përgjigjen drejtuar qeverisë shqiptare nga Asambleja Parlamentare e Këshillit të Europës sqarohet se, "Komisioni për zgjedhjen e gjyqtarëve në Gjykatën Evropiane të të Drejtave të Njeriut, pas procesit të vlerësimit të listës, intervistoi në datën 6 prill të gjithë kandidatët e paraqitur nga Shqipëria. Dhe në përfundim të këtij procesi, Komiteti doli në këtë konkluzion: Për shkak se të gjithë kandidatët nuk janë mjaftueshëm të kualifikuar, Komiteti rekomandon që lista të refuzohet dhe qeveria e Shqipërisë duhet të dorëzojë një listë të re". Kandidatura e Sokol Berberit shkonte për herë të dytë në Asamblenë Parlamentare të KiE- së. Më herët, kjo Asamble e kishte refuzuar Berberin, bashkë me dy kandidatura të tjera, atë të Ina Ramës dhe Gent Ibrahimit, pasi përzgjedhja e tyre në Shqipëri nuk ishte bërë sipas procedurave dhe në përputhje me standardet e kërkuara nga Asambleja dhe Këshilli i Ministrave të BE- së.