"Duam dëmshpërblim për banesat e përmbytura gjatë viteve 2010- 2011"
"Qeveria na dha lekët vetëm për bujqësinë, ku dëmet ishin të papërfillshme" Banorët e Livadeve: Do bojkotojmë zgjedhjet parlamentare
Banorët e lagjes "Li vade" në Shkodër, të cilët u përmbytën gjatë viteve 2010- 2011, dje deklaruan se do të bojkotojnë zgjedhjet parlamentare të 18 qershorit nëse qeveria nuk u jep paratë për dëmet e shkaktuara në banesat e tyre. Ata nuk janë të kënaqur me vendimin e fundit të qeverisë, ku është parashikuar që të jepen dëmshpërblimet për atë periudhë vetëm në sektorin e bujqësisë. Banorët pohuan për "GSH" se qeveria duhet të miratojë dëmet në banesa, pasi aty kanë pësuar dëmin më të madh, që kap vlerën e miliona lekëve. Sipas tyre, dëmet në bujqësi, për të cilat qeveria dha dëmshpërblimin, janë në shuma të vogla dhe të papërfillshme. "Qeveria i ka emrat tanë që jemi përmbytur në vitet 2010- 2011, por edhe listat me vlerësimet përkatëse të dëmeve që na janë shkaktuar atëherë. Vetë shteti shqiptar ka bërë vlerësimet në shtëpinë e secilit prej nesh. Ishte kryeministri në Shkodër, dhe e dëgjuam që foli për dhënien e dëmshpërblimeve të përmbytjeve nga qeveria e tij, ditët e fundit. Në fakt këto dëmshpërblime janë vetëm për dëmet që janë bërë në bujqësi dhe jo për dëmet e shkaktuara në banesa. Në zonën e Nënshkodrës është e vërtetë që u shkaktuan dëme më shumë bujqësi, por në pjesën tjetër, siç është zona jonë e Livadeve, dëmet më të mëdha janë në bane- sa", thanë banorët e lagjes "Livade". Sipas tyre, qeveria dhe kryeministri nuk kanë thënë asnjë fjalë për dëmet në banesa. "Ajo që kërkojmë ne është që qeveria të dëmshpërblejë për dëmet e bëra në banesa, pasi ato në bujqësi janë të papërfillshme, sepse variojnë nga 50 mijë deri në 150 mijë lekë të vjetra. Në banesa dëmet janë deri në 10 milionë lekë të vjetra te një familje e thjeshtë. Ne duam që qeveria të miratojë listën e dëmeve në banesa, sepse aty është dëmi real që është bërë nga përmbyt- jet, ndaj kryeministri nuk mund të krenohet siç bëri në Shkodër, sepse qeveria, s'ka rëndësi e majtë apo e djathtë, na ka ende një borxh të konsiderueshëm për secilin prej nesh", - deklaroi Pal Marku, banor i Livadeve. Ndërkohë, banorët e zonës së
Livadeve kërcënuan me bojkot të zgjedhjeve që pritet të mbahen në qershor. "Ne do të vazhdojmë të reagojnë me të gjitha mënyrat e mundshme dhe bojkoti i zgjedhjeve është një prej tyre, ashtu siç shumë shpejt do të rikthehemi me protesta të mëdha, pasi nuk mund të lejojmë që kjo situatë të vijojë pafund në këtë mënyrë", - u shpreh Renis Myrtja. Ndërsa, Vera Ndreu dhe Prena Marku, banuese po në lagjen "Livade", pohuan se "ne nuk mashtrohemi nga kryeministri Rama. Në rast se nuk jep paratë e dëmeve në banesa, atëherë do protestojmë sërish dhe bojkotojmë zgjedhjet parlamentare".