Laboratori i drogës në Skrapar, përjashtohen 3 policë, nën hetim kreu i bluve në Berat e 7 të tjerë
Altin Qato: Në 3 muaj sekuestruam 28 tonë hashash
SKRAPAR - Një ditë pas zbulimit të laboratorit modern të përpunimit të kanabisit në fshatin Guhak, tre efektivë të rolit bazë të Komisariatit të Policisë së Skraparit janë përjashtuar nga policia. Lajmi u bë me dije dje, nga drejtori i Përgjithshëm për Sigurinë në Policinë e Shtetit, Altin Qato. Gjatë një konference për shtyp, Qato pohoi se janë përjashtuar për shkelje të rënda: Nënkomisar Sokol Çeçaj, me detyrë specialist për krimet në Komisariatin e Policisë Skrapar; inspektor Xhelil Seferasi, me detyrë ndihmës specialist, SPZ në seksionin për rendin në Komisariatin e Policisë Skrapar; si dhe inspektor Leonard Lajthia, me detyrë ndihmës specialist, SPZ në seksionin për rendin në Komisariatin e Policisë Skrapar. Ndërkohë, ka filluar hetimi disiplinor për nënkomisar Krenar Capollari, shef i krimeve në policinë e Skraparit; Ibrahim Maksuti, shef i krimeve në Komisariatin e Policisë Skrapar; kryekomisar Ferdinand Dusho, shef i komisariatit në Skrapar; Artan Musaj, specialist i Antidrogës në Drejtorinë e Policisë Berat; Enea Kaçi, shef i krimeve në Drejtorinë e Be- ratit; komisar Erdit Hazizaj, shef i hetimit të trafiqeve në Drejtorinë e Beratit; Ferdinand Zera, zëvendësdrejtor në Policinë Berat dhe Fatmir Lleshaj, drejtor i Policisë Berat. Gjithashtu, Qato tha se policia do shpërblejë me 300 mijë lekë të gjithë ata që japin informacion për kanabisin. "Çdo e dhënë apo informacion do të vlerësohet nga SHÇBA, duke ruajtur e garantuar anonimatin, dhe për çdo shtetas që do të ofrojë informacion të vlefshëm, është vënë në dispozicion një fond shpërblimi, i cili për nga rëndësia dhe vërtetësia e informacionit do të shkojë deri në 300 mijë lekë", - pohoi Qato. Ndërkaq, Policia e Shtetit bëri një bilanc të luftës antidrogë në
MASAT E MARRA PAS OPERACIONIT ANTIDROGË
periudhën janar- prill të këtij viti. Sipas drejtorit Altin Qato, gjatë kësaj periudhe janë kapur gjithsej 28 tonë hashash dhe janë arrestuar gjithsej 379 persona. Gjithashtu, ai pohoi se policia ka bërë 14.858 kontrolle në të gjithë territorin, ose një mesatare prej 150 kontrollesh në ditë, nëpër: tunele, sera, magazina, ishdepo ushtarake etj. Sipas Qatos, gjatë kësaj periudhe janë hetuar 58 punonjës policie, nga të cilët 13 janë përjashtuar.