Negociatori i Merkel, sot në Tiranë me marrëveshje të shkruar
McAllister e Fleckenstein tentojnë takimin e përbashkët mes Ramës, Metës e Bashës Kreu i Kuvendit anulon vizitën në Bratislavë
Dy negociatorët gjer manë, David McAllis ter e Knut Fleckenstein mbërrijnë sot në Tiranë për të zhvilluar një takim fillimisht me Edi Ramën dhe Ilir Metën e më pas me Lulzim Bashën. Burimet bënë me dije se pas kontakteve të vazhdueshme me palët gjatë këtyre ditëve, ata kanë hartuar një draft për marrëveshje me disa pika. Nëse do të bihet dakord në takimet e veçanta me propozimin ndërkombëtar, McAllister dhe Fleckenstein mund t'i bashkojnë Ramën, Bashën e Metën në një tryezë marrëveshjeje. David McAllister së bashku me Knut Fleckenstein do të qëndrojnë mbi 6 orë në Shqipëri në përpjekje për të zgjidhur krizën politike. Zëvendëspresidenti i Partive Popullore Europiane dhe raportuesi për Shqipërinë në Parlamentin Europian janë mandatuar pas konsensusit të dhënë në Tiranë nga të dyja palët. Mësohet se që prej kërkesës drejtuar Partive Popullore Europiane nga dy krerët e mazhorancës, McAllister dhe Fleckenstein kanë zhvilluar bisedime me përfaqësues të palëve për të rakorduar pikat që do të diskutojnë në Tiranë. Një draft paraprak i hartuar mbi këto bisedime u është dërguar stafeve të kryeministrit Rama, kryeparlamentarit Meta dhe kryetarit të Partisë Demokratike, Basha. Mësohet fillimisht McAllister do të takohet në Pallatin e Kongreseve me 2 drejtuesit e koalicionit, Rama dhe Meta, rreth orës 15: 00. Pas një ore, në axhendë parashikohet takimi me Lulzim Bashën. Mësohet se për shkak të vizitës së McAllister e Fleckenstein, kreu i Kuvendit, Ilir Meta anuloi vizitën e tij në Bratislavë të Sllovakisë. Nga negociatorët nuk do të ketë deklarata për shtyp. Në vend të daljeve mediatike, ata do të përpiqen të afrojnë qëndrimet e palëve. Pika më e nxehtë është kërkesa e opozitës për qeveri teknike. Ajo insistoi edhe dje një ditë para mbërritjes së dy negociatorëve se nuk do të heqë dorë nga qeveria teknike pa Ramën kryeministër dhe paralajmëroi me bllokimin e disa rrugëve kryesore, përshkallëzim të aksionit të saj, nëse ky kusht nuk plotësohet. Edhe qeveria, që prej ftesës drejtuar PPE- se për të negociuar, nuk ka pasur lëkundje nga qëndrimi i saj për të çuar deri në fund mandatin kushtetues, të fituar ligjërisht me votën e popullit, siç është shprehur kryeministri Rama. Mbërritja e dy negociatorëve shihet me shpresë për të gjetur zgjidhje, por në Tiranë është paralajmëruar edhe dështimi i tyre. Vetëm nëse do të gjendet dakordësi mes palëve, negociatorët do të mundësojnë një tryezë mes Ramës, Metës e Bashës për ta zyrtarizuar marrëveshjen. Në të kundërt, kjo parashikohet të jetë përpjekja e fundit e Brukselit për të ndihmuar politikën shqiptare në zgjidhjen e situatës. Nëse palët bien dakord, 2 eurodeputetët do të organizojnë takimin e shumëpritur trepalësh Rama- Basha- Meta për të firmosur marrëveshjen e arritur. Nëse jo, do të largohen duke lënë pas një krizë, që mund të çojë edhe në zgjedhje të parakohshme.