Meta akuzon PD: Axhendë politike antikonsensus
Dialogu politik për zgjidhjen e krizës, kreu i Kuvendit shkon në zyrën e presidentit Nishani "Qeveria teknike, humbasim fokusin nga standardet"
Dështoi dje edhe një tjetër përpjekje për të ulur në një tryezë bashkëbisedimi mazhorancën dhe opozitën. Ishte kryetari i Kuvendit, Ilir Meta, i cili ftoi të gjitha partitë politike parlamentare për të biseduar për zgjidhjen e ngërçit, ndryshimet në Kodin Zgjedhor dhe për zgjedhjen e presidentit të ri të vendit. Edhe pas përpjekjeve të Metës, partitë e opozitës këmbëngulën në bojkotin e tyre. Meta takoi më herët gjatë ditës së djeshme, deputetin e PD- së, Oerd Bylykbashi, por duket se bisedimet nuk arritën të sjellin në tryezën e pasdites së djeshme përfaqësuesit e opozitës. Ndërkohë, pas takimit me partitë, rreth orës 22: 15, kreu i Kuvendit u takua me Presidentin e Republikës, Bujar Nishani në Presidencë, për të diskutuar mundësinë e një tjetër përpjekjeje për uljen e palëve në dialog. I vetmi që respektoi thirrjen e kreut të Kuvendit dje ishte kreu i PAA- së, Agron Duka, i cili qëndroi vetëm pak minuta për të takuar kreun e Kuvendit dhe siç tha pas takimit, shkoi për t'iu bashkuar aleatëve të tij që kishin vendosur të bojkotonin këtë tryezë. Të pranishëm në takim ishin kreu i grupit të PS, Gramoz Ruçi; kryetari i grupit të LSI, Luan Rama i LSI- së; kryetarja e grupit të PDIU, Mesila Doda dhe kreu i Partisë LI-
BRA, Ben Blushi. Pas, takimit informues, kreu i Kuvendit u shpreh për mediat se, "të gjithë janë mirinformuar për përpjekjet e rëndësishme nga partnerët ndërkombëtarë, dialogu brenda vendit ka munguar për një kohë të gjatë dhe është për të ardhur keq që nuk po demonstrohet vullneti, përgjegjshmëria për t'u dhënë qytetarëve një proces normal, të qetë dhe demokratik, siç e meriton çdo qytetar
dhe shoqëria jonë. Opozita ka të drejtën e saj të quajë të kotë këtë tryezë timen. Si kryetar i Kuvendit kam bërë të gjitha përpjekjet për t'u vendosur dialogu që nga dita e parë e vendosjes së çadrës dhe protestës së opozitës për këtë çështje, por është për të ardhur keq që opozita barazon dialogun me ultimatumin". Ju e dini falë përpjekjeve të bëra nga ndërkombëtarët, nga unë dhe LSI janë bërë disa hapa përpara nga ana e mazhorancës aktuale për të krijuar një klimë sa më konstruktive dhe mirëbesimi, por kuptohet që opozita ka një axhendë që nuk po i shërben këtij procesi dhe besoj se nuk do t'i shërbejë edhe vetë opozitës. Pjesëmarrja dhe garantimi i gjithëpërfshirjes i opozitës do të bënte të mundur që opozita jo vetëm të përmirësonte garantimin e standardeve, por të ishte ajo opozitë që kanë nevojë të gjithë qytetarët shqiptarë", u shpreh Meta. Sipas tij, "pasojat e krizave të këtyre viteve janë pasojat e Kodit të bërë në errësirë në ndryshimin e dhunshëm që iu bë Kushtetutës me konsensusin e madh. Përpjekjet për marrëveshje nuk janë shteruar. Vendi meriton qetësi, paqe sociale. Ky Kod ka provuar se nuk jep demokracinë që meriton, e çon vendin nga një krizë në tjetrën", u shpreh Meta. I pyetur në lidhje me zgjedhjen e presidentit, nëse do zgjidhet në këtë legjislaturë, Meta tha: "Besoj se do të zgjidhet në këtë legjislaturë. Dialogu do vazhdojë. I janë bërë mjaft oferta PD- së, për të cilat informova përfaqësuesit e partive parlamentare që morën pjesë, por edhe PD duhet të tregojë vullnet që të përfshihet në këtë proces". Sa i takon qeverisë teknike, Meta u shpreh: "Nëse çdo përpjekje personalizohet te një individ, atëherë humbasim fokusin nga standardet që ka nevojë Shqipëria dhe nuk ndihmojnë zgjidhjen dhe dialogun".