Kamioni me 1.1 tonë drogë, kapen 2 policë dhe doganieri
Ja 5 shkeljet që kryen punonjësit e Pikës së Kalimit Kufitar të Kakavijës Në kërkim shoferi i mjetit që kaloi në Greqi
Prokuroria për Krime të Rënda ka identi fikuar personat përgjegjës për kalimin e një kamioni me rreth 1.1 tonë kanabis në Greqi, në datë 17.02.2017. Në bazë të hetimeve ka rezultuar se përgjegjës për kalimin e mjetit janë punonjës të policisë dhe të doganës në Pikën e Kalimit Kufitar të Kakavijës, të cilët kanë krijuar lehtësitë e nevojshme që një kamion të kalonte pa iu ushtruar kontroll. Kështu, të arrestuarit janë Ylli Rustemi, doganier pranë Doganës Kakavijë, Gjirokastër; Vladimir Skrapalliu, inspektor policie pranë Pikës së Kalimit Kufitar Kakavijë; Blerim Mëhilli, inspektor policie pranë Pikës së Kalimit Kufitar Kakavijë. Ndërsa në kërkim janë shpallur Klement Budo, inspektor policie pranë Pikës së Kalimit Kufitar Kakavijë dhe Qamil Muçaj, banor i fshatit Hekal, Fier, pronari dhe shoferi i kamionit. Hetimi i Prokurorisë për Krime të Rënda nisi fillimisht në bazë të informacionit mediatik për zbulimin e këtij kamioni nga ana e autoriteteve greke dhe më tej nga referimi i Policisë së Shtetit.
HETIMI
Nga hetimet ka rezultuar se më 17.02.2017, në një kamion me targa dhe drejtues shqiptar, është zbuluar
nga ana e autoriteteve doganore në pjesën greke të Kakavijës, një sasi prej rreth 1117 kg lëndë narkotike, e dyshuar kanabis sativa. Shoferi i mjetit, i cili sapo kishte kaluar në doganën dhe Pikën e Kalimit Kufitar shqiptare është larguar menjëherë nga mjeti, sapo ka konstatuar se policia greke kishte zbuluar lëndën
narkotike, e cila gjendej në pjesën e përparme të karrocerisë. Prej atij momenti, shoferi është larguar dhe nuk është gjetur nga ana e autoriteteve greke, të cilat kanë nisur hetimet për llogari të tyre. Pas këtij informacioni, Prokuroria për Krime të Rënda zhvilloi hetimet nga ku rezultoi se punonjësit policorë dhe doganorë, të cilët kishin plotësuar formularët e kontrollit për këtë kamion, në fakt nuk kanë realizuar asnjë kontroll.
SHKELJET E PUNONJËSVE
Sipas prokurorisë, ky kamion nuk i është nënshtruar kontrollit me skaner. Nga ky kontroll do të ishte evidentuar ngarkesa me lëndë narkotike e vendosur në një hapësirë të parapërgatitur në pjesën e përparme të karrocerisë së kamionit, pasi ishte një sasi e konsiderueshme. Kamioni nuk është peshuar në peshoren që gjendet në Doganën Kakavijë. Nëse do të ishte vendosur në peshore, do të dilte një peshë prej 1 ton e 147 kg dhe 423 gramë më shumë sesa pesha e kamionit në dokumentet e tij. Nuk është matur gjatësia e jashtme e karrocerisë së kamionit me hapësirën e brendshme. Diferenca midis dy gjatësive do të ishte e mjaftueshme për të kuptuar se në karroceri ka ndërhyrje. Nuk është bërë kontrolli me qenin antidrogë, që është i destinuar për kontrolle të tilla. Në rast se qeni antidrogë do t'i ishte afruar kamionit apo të ishte futur brenda tij, nisur nga era karakteristike që ka lënda narkotike e llojit kanabis sativa dhe sasia e konsiderueshme që ishte fshehur në kamion, me siguri rezultatet do të ishin pozitive. Nuk është vlerësuar fakti se ky shtetas në mënyrë të përsëritur i është
nënshtruar kontrollit në kufi së bashku me kamionin që drejtonte mbi dyshimet se merret me aktivitet të kundraligjshëm. Për këto arsye, në bazë të hetimeve të deritanishme, Prokuroria për Krime të Rënda ka kërkuar caktimin e masës së sigurisë "Arrest në burg", e miratuar nga Gjykata për
Krime të Rënda, për personat e lartpërmendur, të dyshuar për veprën penale të "Trafikut të narkotikëve", në bashkëpunim. Masat e sigurimit janë ekzekutuar nga ana e efektivëve të Shërbimit për Çështje të Brendshme dhe Ankesa në Ministrinë e Brendshme, si edhe nga Policia e Shtetit.