"Quo Vadis" Shqipëri?

Kryetari i Komisionit të Punëve të Jashtme të Parlamentit Evropian, David McAllister ( Partia Popullore Europiane) dhe Raportuesi për Shqipërinë i Parlamentit Evropian, Knut Fleckenstein ( SPD), ndërmjetësues të përzgjedhur nga BE- ja për të ulur palët në tryezën e bisedimeve, janë larguar nga Tirana mëngjesin e sotëm ( 26.04.2017) për në Bruksel pa asnjë rezultat për zgjidhjen e krizës politike, rikthimin e PD- së në parlament dhe pjesëmarrjen e saj në zgjedhjet parlamentare të 18 qershorit.

DEKLARATA E EUROPARLAMENTARËVE

Në vend të një konference shtypi në orët e vona të mbrëmjes së djeshme, delegacioni i BE- së në Tiranë ka dalë me një deklaratë në emër të dy ndërmjetësuesve. "Dy europarlamentarët paraqitën propozime për të ardhmen që përfshinin pika mbi dekriminalizimin, luftën kundër lëndëve narkotike, masa teknike për përmirësimin e kryerjes së zgjedhjeve dhe masa për ndërtimin e besimit politik. Ata propozuan gjithashtu ide për diskutim mbi datën e zgjedhjeve dhe ndryshime të mundshme parazgjedhore në strukturat e qeverisë për të ndërtuar besim afatgjatë te sistemi. Nga ana e mazhorancës pati dakordësi mbi pikat e propozuara me kusht që vetingu të votohet në parlament. Partia Demokratike iu përmbajt pozicionit të saj për emërimin e një kryeministri teknik dhe miratimin e një sistemi elektronik votimi për të pasur zgjedhje të lira dhe të ndershme", bën me dije kjo deklaratë.

Thelbi i propozimit të dy ndërmjetësuesve europianë McAllister dhe Fleckenstein: riformatim i qeverisë "Rama" për të rritur besimin e opozitës dhe shtyrjen e zgjedhjeve në 16 korrik. Riformatimi i qeverisë parashikonte ndryshimin e ministrave të qeverisë "Rama" në 4 min-