Tryeza e presidentit, nuk ka marrëveshje Rama- Basha
Oferta e kryeministrit për opozitën dhe kushtet e Bashës si garanci e votës së lirë Rama ofron Peleshin dhe ndryshimet kushtetuese
Pas diskutimeve inten sive dhe të vështira në prani të kreut të shtetit, Edi Rama dhe Lulzim Basha u ngritën dje pa marrëveshje nga tryeza e thirrur nga presidenti Bujar Nishani. Shtegun e lanë të hapur për komunikim, por tri orë bisedime nuk prodhuan asnjë rezultat. Propozimet e reja dhe kushtet e vjetra u bënë shkak për ngecjen e negociatave mes palëve. Kryeministri Edi Rama ka lëshuar postin e zëvendësit të tij në qeveri Niko Peleshi, por Basha që në fillim të takimit i ka bërë të qartë se kërkon dorëheqjen e tij si garanci e votës së lirë. Mësohet se kreu i PD- së ka parashtruar menjëherë kërkesën për qeveri teknike. Një qeveri pa Ramën kryeministër që të përgatisë zgjedhjet e përgjithshme, të cilat Basha ka kërkuar që të shtyhen për një datë tjetër. Por në këto kushte, kryeministri Rama është përgjigjur duke thënë se nuk jep dorëheqjen dhe nuk ka qeveri teknike. Po ashtu, ai mësohet të ketë refuzuar shtyrjen e datës së zgjedhjeve përtej 18 qershorit. Burimet sqarojnë se kryeministri Rama nuk i ka ofruar Bashës as 4 ministrat që ishin pjesë e paketës së hartuar nga negociatorët David McAllister dhe Knut Fleckenstein. "Nuk ka kohë që të implementohen ndryshimet në qeveri", - ka deklaruar Rama. Mësohet se i vetmi propozim i Ramës pas kësaj ka qenë ai për të ndërhyrë në Kushtetutë. Ndërhyrjet kanë të bëjnë me sanksionimin në Kushtetutë të ndryshimeve në qeveri 2 ose 3 muaj para zgjedhjeve, por që këto të kenë fuqi për zgjedhjet e tjera, pas atyre të 18 qershorit. Rama ka propozuar edhe formimin e një ministrie të posaçme për implementimin e këtyre propozimeve dhe teknikaliteteve që kanë të bëjnë me zgjedhjet. Por, propozimet nuk janë pranuar, të paktën në tryezë, dhe palët janë ngritur pa marrëveshje. Por sipas "GSH. al", kryeministri mësohet t'i ketë thënë Bashës që është i gatshëm të japë postin e zv/ kryeministrit, gjysmën e ministrave, drejtimin e KQZ- së, por jo shumicën e anëtarëve, si dhe një drejtor të Përgjithshëm policie të zgjedhur me konsensus. Rama ka konfirmuar se nuk ka ndërmend të dorëhiqet nga
posti i kryetarit të qeverisë. Kjo "ofertë" duket se nuk është pranuar nga kreu i PD- së, i cili mësohet t'i ketë thënë Ramës se "pranoj edhe më pak se gjysma e qeverisë, por jo me ty kryeministër". Basha ka pohuar që mund të pranojë një kryeministër tjetër të PSsë, por jo vetë Edi Ramën. Pavarësisht se nuk ka pasur marrëveshje midis Ramës dhe Bashës, duket se negociatat mes palëve do të vijojnë. "Mendohuni! Nëse bini dakord, më thoni për teknikalitetet". Si-
pas "GSH. al", këto kanë qenë fjalët që mësohet se i ka thënë kryeministri Edi Rama përpara se të dilte nga takimi, kreut të opozitës. Tani vendimi mbetet në dorën e këtij të fundit për të hyrë në zgjedhje apo për të refuzuar edhe njëherë ofertën që i bëhet opozitës. Mësohet se Lulzim Basha u konsultua edhe me presidentin Nishani për hapat që do të ndërmarrë, dhe më pas me ish- kryeministrin Sali Berisha. Presidenca reagoi pas dështimit të takimit 3-
orësh mes kryeministrit Edi Rama dhe kryetarit të PD- së, Lulzim Basha. "Me ftesë të Presidentit të Republikës, u zhvillua një takim midis kryeministrit Rama dhe liderit të opozitës Basha. Gjatë takimit palët prezantuan pikëpamjet e tyre mbi krizën politike dhe rrugët e zgjidhjes së saj. Presidenti vijon të mbajë kontaktet me palët për gjetjen e një zgjidhjeje të mundshme mbi bazë kompromisi", thuhet në njoftimin e presidencës.