Banka e Shqipërisë mban normën bazë në 1.25%

Në

afatin e shkurtër, situata e tensionuar politike në vend mund të ndikojë në rritjen e pasigurisë dhe shtyrjen në kohë të investimeve dhe të konsumit. Në afatin e mesëm rreziqet janë të lidhura kryesisht me pasiguritë në mjedisin e huaj dhe me shpejtësinë e rikuperimit të kredisë. Këshilli Mbikëqyrës i Bankës së Shqipërisë ka vlerësuar në mbledhjen e fundit se qëndrimi aktual i politikës monetare mbetet i përshtatshëm dhe vendosi të mbajë të pandryshuar normën bazë të interesit, në nivelin 1.25%. Gjithashtu, këshilli vendosi të mbajë të pandryshuar normat e interesit të depozitës dhe të kredisë njëditore, respektivisht në nivelet 0.25 dhe 2.25%. Në daljen për shtyp, guvernatori i Bankës së Shqipërisë, Gent Sejko tha: "Informacioni i ri i analizuar në raportin tremujor të radhës ka rezultuar përgjithësisht në linjë me pritjet tona. Të dhënat e reja ekonomike dhe financiare tregojnë një përshpejtim të rritjes ekonomike dhe përmirësim të balancave kryesore makroekonomike gjatë fundit të vitit 2016 dhe fillimit të vitit 2017. Në veçanti, inflacioni dhe pritjet për inflacionin kanë ardhur në rritje gjatë kësaj periudhe". Sejko tha se analiza e informacionit të disponuar evidenton rolin pozitiv që ka pasur politika jonë monetare. Kushtet monetare stimuluese kanë favorizuar rritjen e kreditimit dhe uljen e kostos së shërbimit të borxhit. Në këtë mënyrë, ato kanë mbështetur gjallërimin e konsumit dhe të investimeve private, si dhe kanë krijuar parakushtet e nevojshme për kthimin e inflacionit në objektiv. Përditësimi i parashikimeve afatmesme sugjeron se ekonomia shqiptare do të vazhdojë të rritet dhe se inflacioni do të kthehet në objektiv brenda vitit 2018.