Zaev "tradhton" shqiptarët: Kosova është zemra e Serbisë
Lideri i LSDM- së: Serbët janë populli im, si ortodoksë të ndihmojmë njëri- tjetrin "Kishat, jo në duar të myslimanëve shqiptarë"
Falë koalicionit me sh qiptarët, Zoran Zaev mund të bëhet Kryeministri i ri i Maqedonisë. Kryetari i LSDM- së arriti në një marrëveshje me shqiptarët, për të integruar edhe platformën e tyre brenda qeverisë së re. Megjithatë, ende pa arritur këtë objektiv, shqiptarët kanë marrë një "thikë pas shpine" nga Zaev. Politikani maqedonas, në një intervistë të fundit për mediat serbe ka shfaqur qëndrimet e tij radikale dhe antishqiptare, ndoshta edhe më të theksuara se kundërshtari Nikolla Gruevski. Në intervistën për "Kurir. tv", Zaev ka thënë se nuk bën dallime mes maqedonasve dhe serbëve. "Dëgjuam akuza se Zaevi ka pranuar ta padisë Serbinë për gjenocid. Për mua ai është populli im", - tha kreu i LSDM- së, teksa fliste për popullin serb. Ai madje ka kritikuar Gruevskin, duke u shprehur se ka gabuar që ka pranuar pavarësinë e Kosovës dhe pranimin e saj në UNESCO. "Serbia është vendi i parë që meriton përkrahjen tonë, sepse jemi popuj ortodoksë, të krishterë dhe duhet të ndihmojmë njëri- tjetrin", - ka shtuar Zaev, duke shprehur shqetësim për kishat dhe manastiret serbe që kanë mbetur në duar të shqiptarëve myslimanë. Megjithatë, Zaev, pavarësisht deklaratave antishqiptare, ka lënë të pakënaqur edhe serbët, veçanërisht kryeministrin Aleksandër Vuçiç. Kjo pasi kreu i LSDM- së tha se Serbia mbështet Nikola Gruevskin dhe VMRO- në, pasi ajo drejtohet nga nacionalistë si Aleksandar Vuçiç. Kryeministri dhe presidenti i zgjedhur serb, Aleksandar Vuçiç ka thënë se drejton një politikë të paqes me të gjithë rajonin. Përveç Zaev, të cilit i ka thënë se nuk drejton politikë nacionaliste, Vuçiç ka komentuar edhe deklarimet e ish- kryeministrit kosovar, Ramush Haradinaj. "Shqiptarëve ua kam zgjatur dorën dhe nuk bëj shaka me ta", - tha ai, duke shtuar se e shqetëson vetëm heshtja e Europës. "Jam mësuar se sa lehtë bashkohen të gjithë shqiptarët dhe ndihmësit e tyre, të cilët kanë vetëm një qëllim: të sulmojnë Aleksandar Vuçiçin. Nuk e bëjnë këtë për shkakun tim, por sepse i pengon fuqizimi i Serbisë", - tha Vuçiç. Deklarimet nga Maqedonia i kanë kritikuar edhe dy ministra serbë. Shefi i diplomacisë serbe, Ivica Daçiç e quan atë një deklaratë skandaloze. Por Serbia nuk do të reagojë, pasi Zaev ende nuk e ka marrë pushtetin. "Maqedonia ka njohur Kosovën dhe ka votuar për Kosovën në UNESCO. Këto qëndrime të një personi që pretendon të jetë kryeministër nuk mund të shihen si miqësore. Por, ne mundohemi të drejtojmë një politikë të paqes", - tha Ivica Daçiç, ministër i Jashtëm i Serbisë. Vuçiç është angazhuar për Maqedoninë dhe ka bërë thirrje për zgjidhje me dialog. Por, angazhimi i Tiranës dhe Prishtinës është parë si cenim për tërë rajonin nga zyrtarët serbë.