Edi Rama anulon zgjedhjet lokale në Kavajë, ja arsyet
Pas vendimit të kryeministrit tërhiqen nga gara dy kandidatët “Bashën e pres deri më 7 maj, zgjedhjet më 18 qershor”
Kryeministri Edi Rama u kërkoi dje kandidatit socialist dhe atij të pavarur në Bashkinë e Kavajës që të tërhiqen nga gara, për të shmangur destabilizimin e vendit. Në një deklaratë për median, kreu i qeverisë pohoi se "ka një plan për destabilizim të këtij vendi, që çadra është ngritur për ta vënë në jetë këtë plan, që pas atyre që janë ngujuar në çadër nga frika e drejtësisë, ka të tjerë që e duan destabilizmin për të dëmtuar Shqipërinë, këto nuk janë më hamendje. Janë fakt!". Pas deklaratës së kryeministrit Rama, kandidati i PS- së, Klodian Shehi pohoi se "interesi kombëtar është më i rëndësishëm", duke pranuar të dorëhiqet. Po kështu, edhe kandidati i pavarur, Astrit Haka dorëzoi dorëheqjen në KZAZ- në 42 në Kavajë, duke deklaruar në kërkesën e tij: "Nuk e dëshiroj aspak destabilizimin e gjendjes politike, e cila shkon drejtpërdrejt në dëm të qytetarëve të Kavajës". E ndërsa në çadër kishte filluar festa dhe thirrjet e demokratëve "Fitore, fitore", Rama shkroi në rrjetin social: "Lulëzim, fitore të tilla paç ngahera, po a më thua dot si ka mundësi që anëtarët e tu në KQZ po zihen kundër tërheqjes së kandidatit tonë?". Në deklaratën e tij, kryeministri i vendosi edhe një limit për negociata kryetarit të PD- së, Lulzim Basha, duke mos lëvizur nga data 18 qershor për zgjedhjet e përgjithshme. "I përsëris Lulzim Bashës, lëre tani Kavajën, hiqe nga mendja se mund ta shtysh me provokime, jo datën, por as afatin fundor të mundësisë për të hyrë në zgjedhje, që është 8 maji dhe fokusohu tek zgjidhja që të është ofruar deri në 7 maj", u shpreh Rama. "Unë jam gati të ulem përsëri me Lulzimin, por këtë herë për të detajuar ofertën që ai ka në tavolinë e jo për të filluar nga e para avazin e qeverisë teknike dhe të shtyrjes së zgjedhjeve në kalendat greke, me sebepin qesharak të përgatitjes së votimit elektronik. Zgjedhjet do të bëhen në 18 qershor dhe të hënën më 8 maj, unë nuk jam më në dispozicion për Lulzim Bashën dhe PD- në, nëse deri të dielën, ata nuk bien dot dakord për ofertën, për ndryshimin e menjëhershëm të Kodit Zgjedhor, sipas rekomandimeve të ODIHR- it dhe zhbllokimin e vetingut, natyrisht", theksoi kryeministri. Duke kërkuar durimin e të gjithëve, Rama nënvizoi: "Jemi në prag të një zhvillimi me rëndësi të madhe në vendin tonë. Dhe me PD, pa PD, më 18 qershor populli do vendosë jo thjesht se kë do ngarkojë për të qeverisur Shqipërinë për katër vitet që vijnë, por si do jetë Shqipëria e gjeneratës tjetër". Sipas tij, "18 qershori, për sa më takon, nuk mund
të jetë pjesë e asnjë negociate mes partive, sepse partitë duhet t'i garantojnë dhe jo t'i negociojnë të drejtat e popullit sovran". "Ju siguroj se, nëse si kryetar partie s'kam as më të voglin shqetësim në qoftë se Partia Demokratike vendos t'i shkojë deri në fund një strategjie politike vetëvrasëse, si kryeministër nuk dua të lë asnjë gur pa
luajtur që qytetarët që duan ende të votojnë PD- në, të kenë mundësinë ta bëjnë këtë në 18 qershor", u shpreh dje pasdite Rama. "Partia Demokratike, natyrisht është një parti historike, por nuk do të ishte as e para dhe as e fundit parti historike në historinë e demokracisë që do të dilte nga skena e historisë. E dhimbshme për ata
që e duan akoma PD- në, por normale për jetën e gjallë, demokratike, që është një jetë në proces. Ama një gjë është shumë e rëndësishme të mbahet mirë parasysh sot, kjo shumicë qeverisëse jo vetëm nuk ka bërë asgjë për ta shtyrë Partinë Demokratike në rrugën e vetëshkatërrimit, ku të çon pa kthim dalja nga shinat e
sistemit demokratik, por ka bërë gjithçka për të kundërtën. Kemi bërë gjithçka dhe do të bëjmë gjithçka deri në sekondën e fundit, gjithçka na takon për ta garantuar pjesëmarrjen e Partisë Demokratike në zgjedhje dhe për të mos i lënë votuesit e saj besnikë pa zgjedhje", nënvizoi kryeministri.