Lirohet nga burgu miku i Shullazit, Pajtim Serjani
Pajtim
Serjani, miku i Emiljano Shullazit është liruar nga burgu pasi ka përfunduar dënimin për akuzën e shtrëngimit për dhënie pasurie. Serjani u dënua për gjobëvënie ndaj biznesmenit të kafes, Julian Bregu në vitin 2014. Lirimi i tij është bërë pasi përfundoi dënimin prej 3 vitesh të dhënë nga Gjykata e Apelit, pasi bashkë me të tjerë i bëri presion biznesmenit të kafesë, Julian Bregu të lëshonte një pjesë të aksioneve të tij. Në shkallën e parë, Serjani ishte dënuar me 7 vite burg. Serjani mbeti i plagosur më 5 janar 2015 në një lokal në Rrugën e Kavajës, pasi Arjanit Sterjo qëlloi mbi tavolinën ku po qëndronte ai, polici Roland Meta, Ditmar Reçi dhe Denis Ramani. Ndërkaq, sipas dosjes së prokurorisë, më datë 6 shkurt 2014, biznesmeni Julian Bregu është telefonuar në orët e drekës nga një shok i tij i quajtur Arianit Luli, i cili i ka kërkuar të pinin një kafe. Të dy janë ulur në një bar në afërsi të Liqenit Artificial. Pas disa minutash, Arianitin e ka telefonuar Elvis Karoli, të cilit Arianiti i ka treguar se ku ndodheshin dhe e ka ftuar që të vinte edhe ai te lokali. Në kafe ata fillimisht kanë biseduar për gjëra të përgjithshme, por më pas Elvis Karoli i ka thënë Arianitit se dispononte çelësat e një apartamenti në afërsi të Kodrës së Diellit. Arianiti ka shfaqur interes për të parë shtëpinë dhe ka ftuar edhe biznesmenin Bregu që të shkonte me ta për të parë shtëpinë dhe për të dhënë mendimin e tij nëse Arianiti duhej ta blinte apo jo. Më pas, në kohën që kanë qenë duke parë ambientet e apartamentit, i cili ka qenë bosh dhe i pashtruar, ka ardhur një person i maskuar me një pistoletë me silenciator në dorë dhe u ka drejtuar armën personave e i ka pyetur për emrat. Më pas i ka thënë biznesmenit Bregu: "Me ty e kam". Në dosjen e prokurorisë thuhet se Pajtim Serjani ka ardhur në apartament dhe i ka thënë biznesmenit se përse merrej me Ditmarin kur ai e dinte se pas Ditmarit ishte Pajtimi. Më pas Pajtimi është larguar, ndërsa personi i maskuar ka tentuar disa herë të lidhej në "Skype" me një person. Pasi ka mundur të lidhet, i ka kërkuar biznesmenit të kafesë të fliste me personin në anën tjetër të telefonatës, i cili ishte Genci F.. Biznesmeni ka folur në telefon me Genci F., i cili i ka thënë: "Hera e parë dhe e fundit që të flas. Për firmën e kafes që ke, 40 për qind do i mbash ti, 30 për qind kinezi dhe 30 për qind do i mbaj unë me vëllain tim".
kl. la