Meta: Kemi një elitë politike të vetëkënaqur, të zhytur në egoizëm
Kryetari i Kuvendit, thirrje të rinjve: Duhet të jeni modeli i kundërt i arrogancës Bostinaru: Mbështesim simotrat, në koalicion apo të ndara
Kryetari i Kuvendit, Ilir Meta, u bëri thirrje të rinjve të merren me politikë për të zgjidhur më shumë shqetësime të tyre. Meta ishte në konferencën "Promovimi i të rinjve në Ballkanin Perëndimor" të organizuar nga aleanca progresiste e Socialistëve dhe Demokratëve ( S& P) në Parlamentin Evropian, ku mungoi kryeministri Edi Rama, edhe ose i ftuar. Të pranishëm në këtë aktivitet ishin Ministri i Mjedisit, Lefter Koka, Ministrja e Ekonomisë, Milva Ekonomi, eurodeputetët Knut Fleckenstein, Tanja Faion e Victor Bostinaru, deputetja e LSI- së, Kejdi Mehmetaj, etj. Zv. kryetari i grupit socialdemokrat Boshtinaru vuri në dukje se konferenca ishte vendosur të organizohej kur zgjedhjet nuk ishin ende të sigurta. "Ne nuk duam të ndikojmë në zgjedhje, por sigurisht që shprehim mbështetjen për partitë tona simotra, qofshin në koalicion apo duke konkurruar ndarazi në zgjedhjet parlamentare", tha ai. Në fjalën e mbajtur në konferencë, Kryetari i Kuvendit, u shpreh se të rinjtë që janë fuqia më e madhe e një kombi dhe se duhet të marrin më shumë përgjegjësi për të ardhmen e vendit.
"Ajo që ne na duhet sot përsëri në Shqipëri është një angazhim akoma më i fortë i të rinjve dhe të rejave të Shqipërisë, sidomos kur shohim fenomenet e largimit jo vetëm në Shqipëri, por edhe në vendet e tjera të Ballkanit për arsye të ndryshme. Na duhet, sepse pavarësisht arritjeve që ka Shqipëria, të rinjtë janë të paduruar dhe duan një ritëm ndryshimi më të shpejtë dhe në këtë drejtim është shumë e rëndësishme dhe shumë e domosdoshme që politika t'i përgjigjet këtij padurimi me një strategji të qartë dhe që e rrit besimin se Shqipëria do të krijojë këto mundësi, që të krijohen këto perspektiva, këto vende të reja pune dhe të mirë paguara që këta të rinjtë të punësohen këtu, të përballojnë kostot e jetesës që nuk janë të lehta dhe t'i krijojnë familjet e tyre këtu", - deklaroi Kryetari i Kuvendit. "Duhet të çojnë më shumë të rinj dhe të reja dhe më pak biznesmenë, sepse nëse çojmë më shumë të rinj dhe të reja në parlament do të diskutohet më shumë për problemet e arsimit, për problemet e Maturës Shtetërore, për problemet e formimit profesional", tha më tej, Meta. Duke kujtuar se si ka hyrë ai në politikë dhe se si ka mbështetur për të futur në listat e kandidatëve Klajda Gjoshën e Kejdi Mehmetajn, Meta u shpreh: "Duam që në parlamentin e ardhshëm të mos diskutohet më për deputetë që kanë apo jo rekorde kriminale. Në parlamentin e ardhshëm nuk duam më që të diskutohet për deputetë që morën këto apo ato tenderë". "Ndaj unë mendoj që fuqizimi i organizatave rinore në vend është shumë i rëndësishëm, sepse ne sot kemi një elitë politike të vetëkënaqur, një elitë politike të zhytur në egoizëm dhe individualizëm", theksoi Meta.
"Të rinjtë njëkohësisht duhet të jenë modeli i kundërt i arrogancës dhe i
konfliktit, në mënyrë që të rrisin shpresën e vendit dhe të shoqërisë te vetë të rinjtë, që merren dhe angazhohen në politike, por në çdo fushë duke qenë shembulli i bashkëpunimit dhe i tolerancës,
duke qenë shembulli i përqendrimit i çështjeve konkrete dhe në një vizion të qartë, i cili ndihmon vendin të zhvillohet në kapacitetet e tij, jo nën kapacitet e tij", nënvizoi Meta.