Gjoza: Rast i mbyllur që në 2013. Luan Rama: Karteli i drogës kontrollon Çakon
Policia
e Tiranës kallëzoi dje në Prokurori adminis tratorin e Njësisë Bashkiake numër 2, Elez Gjoza. Sipas njoftimit të policisë, përfaqësuesi i LSI- së ka regjistruar fiktivisht 70 persona me të njëjtin kod banimi me atë të banesës së tij. Ky veprim, sipas policisë, është bërë me qëllim ndikimin në zgjedhjet e 25 qershorit.
Edhe zv. kryeministrja Ledina Mandija kërkoi hetim për këtë rast. Ndërsa vetë, Gjoza sqaroi pretendimet e tij, në një konferencë për shtyp nga selia e LSI- së, bashkë me nënkryetarin e kësaj partie, Luan Rama. "Kjo është për mua, në mënyrë absolute, me tendencë politike. Ky problem është ezauruar në 2013 nga prokuroria. Në banesën time kanë ardhur të regjistruar me kontratë noteriale dhe të gjithë janë të larguar, jo 70 persona, mbase dhe më shumë. Të gjithë janë larguar nëpër shtëpitë e tyre me qira duke funksionuar sipas ligjit të gjendjes civile", tha Gjoza, i cili akuzoi Saimir Tahirin për presion. Nga ana e tij, nënkryetari i LSI- së, Luan Rama akuzoi Policinë e Shtetit për manipulim. "Nëse u hoqën 10 apo 12 drejtorë që ishin pengu i trustit të drogës, karteli i drogës vazhdon të ketë nën kontroll Drejtorin e Përgjithshëm të Policisë së Shtetit dhe po e përdor për të instrumentalizuar Policinë e Shtetit në rol politik për të goditur padrejtësisht kundërshtarët politik", tha Luan Rama. Sipas tij, "zgjedhjet e 25 qershorit me apo pa dëshirën e Haki Çakos, apo të atyre që e komandojnë në mënyra okulte Haki Çakon, jashtë dijenisë dhe autoritetit të ministrit të Brendshëm, do t'i fitojë LSI, do t'i fitojnë qytetarët shqiptarë".
MONIKA KRYEMADHI
ZV. kryetarja e LSI- së, Monika Kryemadhi njoftoi dje mitingun e madh të LSI- së më datë 15 qershor, në sheshin "Nënë Tereza". Në statusin e publikuar në "FB", ajo u shpreh: "Kemi besimin e të rinjve, të atyre që do ta çojnë përpara këtë vend dhe që nuk i frikëson dot askush, as falangat e pushtetit policor, që drejtohen nga Haki Çako, por dhe as nga shefat e tij, të PS ose PD qofshin".