Zgjedhjet, Mandija: Nuk pengojmë impenjimin e zyrtarëve si komisionerë
Zv. kryeministrja sqaron se asnjë ministër teknik nuk ka dhënë urdhër
Zëvendëskryeministrja
Ledina Mandija deklaroi dje, se nuk ka asnjë pengesë për punonjësit e administratës që të angazhohen si komisionerë në zgjedhjet e 25 qershorit. Duke iu përgjigjur KQZ- së, zv. kryeministrja u shpreh në një deklaratë të shpërndarë nga zyra e saj, se ministrat teknikë nuk do t'i pengojnë këta punonjës. "Zyra e shtypit e zv/ kryeministres Ledina Mandija deklaron se, nuk ka asnjë pengesë nga ministrat teknikë për angazhimin e punonjësve të administratës si komisionerë në nivele të ndryshme të administrimit në zgjedhje", thuhet në njoftimin e djeshëm. "Nisur nga një lajm se ministrat teknikë po bëhen pengesë për punonjësit, të cilët janë në marrëdhënie pune, si dhe janë të angazhuar edhe si komisionerë në KZAZ, sqaron se, jo vetëm nga ana e minis- trave teknikë, por asnjë ministër nuk ka dhënë urdhër për të penguar angazhimin e këtyre personave si komisionerë në KZAZ", - sqaron zv. kryeministrja. "Vendimi i Këshillit të Ministrave nr. 473, datë 1.06.2017, në pikën 5, përcakton qartë dhe saktë se punonjësi i administratës ka të drejtë të angazhohet si komisioner në KZAZ, KQV dhe në grupet e numërimit të votave. Zv/ kryeministrja Mandija përfiton nga rasti t'iu bëjë thirrje të gjithë punonjësve të administratës, të cilët ndeshen me pengesa të kësaj natyre, ta adresojnë shqetësimin pranë zyrës së zv. kryeministrit dhe ministrive të linjës", vijon deklarata. Zv/ kryeministrja Mandija përfiton nga rasti t'iu bëjë thirrje të gjithë titullarëve të institucioneve dhe drejtuesve të administratës që të mos paraqesin pengesa për punonjësit të cilët janë të angazhuar si komisionerë zgjedhorë.