Ministrja Ekonomi: Lehtësuam kushtet për të bërë biznes
Investimi 5 milionë euro në Durrës
Ministrja
e Zhvillimit Ekonomik, Turizmit, Tregtisë dhe Sipërmarrjes mori dje pjesë në ceremoninë e inaugurimit të impiantit të përpunimit të granitit Durrës, një investim prej 5 mln euro në makineri e pajisje. Ministrja Milva Ekonomi si e ftuar nderi, preu shiritin e këtij investimi të madh të kësaj kompanie, një investim që sjell një vlerë të shtuar në ekonominë shqiptare. Ministrja Ekonomi në fjalën e saj përshëndetëse në këtë ceremoni tha se kjo kompani nisi fillimisht punën si tregtuese e granitit dhe mermerit, ndërsa sot ka kaluar në një nivel tjetër në prodhimin e tyre dhe eksportim në tregjet botërore. Ministrja Ekonomi ndërsa vlerësoi suksesin e kësaj kompanie theksoi se dhe shteti, dhe veçanërisht Ministria e Zhvillimit Ekonomik, Turizmit, Tregtisë dhe Sipërmarrjes, që ajo drejton, ka dhënë kontributin e vet në zhvillimin e sipërmarrjeve shqiptare, pasi ka lehtësuar procedurat doganore dhe lehtësirat për biznesin, duke krijuar një klimë shumë pozitive për biznesin. Ajo premtoi se mbështetja ndaj sipërmarrjes do të vazhdojë dhe në qeverisjen e ardhshme. " Vlera e investimit prej 5 mln euro, i dha një dimension tjetër prodhimit tuaj. "Jeni një shembull suksesi i kësaj industrie në Ballkan! Besoj se dhe ne të Ministrisë së Zhvillimit Ekonomik, Turizmit, Tregtisë dhe Sipërmarrjes ndihmuam disi në suksesin tuaj, pasi kemi lehtësuar më shumë procedurat e biznesit dhe i dhamë mbështetje eksportit të produkteve vendore. Sot edhe procedurat doganore dhe mënyrat si i qasemi biznesit janë më të lehta se disa muaj më parë dhe besoj se edhe ju keni përfituar nga këto masa"tha Ekonomi.