Fleckenstein: BE duhet të hapë negociatat me Shqipërinë tani
Eurodeputeti: Zgjedhjet kaluan në një atmosferë paqësore
Eurodeputeti
gjerman, Knut Flecken stein, në një intervistë për "Deutsche Welle", vlerëson zhvillimin e zgjedhjeve në Shqipëri dhe e sheh të hapur rrugën për çeljen e negociatave të anëtarësimit të Shqipërisë. I pyetur se çfarë note do t'u jepte zgjedhjeve parlamentare në Shqipëri, Knut Fleckenstein u shpreh se, "ne nuk shpërndajmë nota, por përshtypja ime e përgjithshme është se ato në masë të madhe ishin të rregullta". "Megjithatë, kam dëgjuar edhe për raste si blerja e votës dhe kjo duhet parë si të luftohet, sepse është një çështje se si do të organizohet një vend, madje deri diku edhe një çështje nderi për një vend", tha ai. "Dhe unë jam i gëzuar që mund të themi se zgjedhjet kaluan kryesisht në një atmosferë paqësore, ashtu siç duhet të jetë dhe se këtu kryeministri Rama dhe Basha me ujdinë e tyre dhanë një kontribut të madh për këtë", tha ai. Ndërsa duke komen- tuar rezultatin zgjedhor, ku PS fitoi bindshëm duke kapur një shumicë absolute, Fleckenstein u shpreh se, "shumicat absolute gjithmonë e mbajnë një rrezik me vete, pra që qeveritë e ekzagjerojnë, por në shumë vende ka qeveri që qeverisin me shumicë absolute". I pyetur nëse janë plotësuar më në fund të gjitha kushtet që BE të japë dritën e gjelbër për të hapur negociatat e anëtarësimit të Shqipërisë në vjeshtë, Fleckenstein tha: "Sa i përket atmosferës, këto zgjedhje ishin shumë më të kënaqshme se të mëparshmet". "Kur dëgjoj vëzhguesin tonë, zotin Kukan që ishte aty, përmirësimi është i dukshëm. Besoj se nuk ka si bëhet ndryshe, veçse ta themi qartë se tani duhet që të hapen negociatat. Ndoshta do të kalojnë pak javë e muaj derisa të ulen të gjithë në një tavolinë, por nuk duhet të vendosim pengesa të reja, sepse kjo nuk do ishte e drejtë", përfundoi ai.