Mediu: Faktorët që sollën humbjen e opozitës
Kreu
i PR- së, Fatmir Mediu, analizoi dje faktorët që ndikuan sipas tij, në humbjen e opozitës. I ftuar në "News 24", aleati i Bashës tha se në këtë proces ka qenë shqetësuese situata me krimin dhe drogën, ç'ka sipas tij solli blerjen e votës. Sipas Mediut, edhe në raportin e OBSE/ ODIHR është pasqyruar shqetësimi për blerjen e votës në zgjedhjet parlamentare të 25 qershorit. Një tjetër faktor që sipas kreut të PR ka ndikuar në humbjen e opozitës në këto zgjedhje është pjesëmarrja e ulët e qytetarëve në votime. "Kanë qenë fenomene shoqëruese, që njiheshin gjatë periudhës së fushatës, rreziku nga krimi, droga, tentativa për blerjet e votës. Raporti i OSBE e ka përmendur faktin e blerjes së votës. Shkonin nga 100- 200 mijë lekë të vjetra. Nëse rastet janë denoncuar do të thotë se ky nuk është një fenomen i izoluar, por i pranishëm. Ne po kalojmë në korruptimin e shoqërisë, duke i thënë se nuk ka vlerë zgjedhja e tyre, por që zgjedhja e tyre do të blihet. Rama bëri një fushatë qesharake, pa thelb e pa përmbajtje. Kryeministri e ka raportin me qytetarët, jo me koalicionin apo të tjerët", tha ai.
Partia Demokratike u adresoi dje kritikëve të saj mesazhin që të mos nxisin përçarje brenda partisë, por të ruajnë etikën dhe të bashkohen pas humbjes së zgjedhjeve për ringritjen e PD- së. Nënkryetarët e PD, Edi Paloka dhe Edmond Spaho iu kundërpërgjigjën dje akuzave të bëra më herët nga sekretari i përgjithshëm Arben Ristani ndaj Lulzim Bashës, për shkelje të statutit të partisë me dhënien e drejtimit dy nënkryetarëve. Dy nënkryetarët demokratë, Edi Paloka dhe Edmond Spaho në një deklaratë të përbashkët të shpërndarë për mediat theksojnë se statuti i partisë nuk është shkelur, as në rastin e kalimit të kompetencave nga Basha tek ata, as në përcaktimin e datës së zgjedhjeve. Për të mbështetur këtë deklaratë, Paloka dhe Spaho citojnë Nenin 43, pika 1 dhe 2 për nënkryetarët e partisë ku thuhet: "Partia Demokratike ka dy nënkryetarë, të cilët në mungesë të zgjatur të kryetarit dhe me autorizimin e tij, njëri prej tyre zëvendëson kryetarin. Në mungesë të këtij autorizimi, siç është rasti kur ai ka dhënë dorëheqjen, sekretari i përgjithshëm mbledh Këshillin Kombëtar, i cili komandon nënkryetarin që do të drejtojë partinë deri në vendimin përfundimtar të Kuvendit Kombëtar", thuhet në deklaratë. Në këtë mënyrë, dy nënkryetarët e PD hedhin poshtë pretendimet e sekretarit të përgjithshëm, Arben Ristani, i cili më herët deklaroi se vendimi i Bashës për t'ia deleguar kompetencat dy nënkryetarëve është në shkelje të statutit dhe se kjo kompetencë i takon Këshillit Kombëtar. Z. Ristani deklaroi gjithashtu se edhe vendimi i dy nënkryetarëve për të thirrur zgjedhjet, caktimin e datës së zgjedhjeve dhe datës së paraqitjes së kandidaturave është vendim i pambështetur në statut. Por edhe në këtë rast, Paloka dhe Spaho hedhin poshtë pretendimet e Ristanit, duke sjellë në vëmendje nenin 58 për afatin e zgjedhjeve, në të cilin thuhet se të gjitha organet e partisë duhet t'u nënshtrohen zgjedhjeve të paktën çdo 4 vjet. "Zgjedhjet e fundit për kryetarin e partisë janë zhvilluar më 22 korrik 2013. Vendimi për mbajtjen e zgjedhjeve respekton këtë afat fundor për kryerjen e
zgjedhjeve të radhës më 22 korrik 2017", thuhet në deklaratën e Palokës dhe Spahos. Në reagimin e tyre, nënkryetarët e PD theksojnë gjithashtu se zgjedhjet për kryetar janë të hapura dhe çdo anëtar i kësaj force politike ka të drejtë të kandidojë. Konkretisht, në ne-
nin 58 të statutit të PD- së që ka të bëjë me afatet e zgjedhjeve thuhet: "Të gjitha organet e partisë duhet t'u nënshtrohen zgjedhjeve të paktën çdo katër vjet". "Kryetari i partisë, z. Lulzim Basha ka autorizuar publikisht delegimin e të gjithë vendimmarrjes organizative
te dy nënkryetarët e PDSH dhe te sekretari i përgjithshëm. Zgjedhjet e fundit për kryetarin e partisë janë zhvilluar në 22 korrik 2013. Vendimi për mbajtjen e zgjedhjeve respekton këtë afat fundor për kryerjen e zgjedhjeve të radhës më 22 korrik 2017. Gara dhe votimi
për kryetarin e PDSH do të zhvillohen në mënyrë të hapur, të ndershme dhe të barabartë. Nga ky proces, Partia Demokratike do të dalë më e fortë dhe më demokratike për t'u paraprirë ndryshimeve të mëdha që ka nevojë vendi", thuhet në deklaratën e përbashkët.