Atentati ndaj Tofik Hykës, dyshime se biznesmeni u kërcënua pak ditë më parë
Çfarë fiksuan kamerat e sigurisë, mjekët e spitalit: Po e mbajmë në terapi intensive Policia merr në pyetje të afërmit e tij
Biznesmeni Tofik Hyka, i cili u qëllua me dy plumba, në kokë e afër zemrës, dhe që fatmirësisht shpëtoi, dyshohet të jetë kërcënuar pak ditë para se t'i bëhej atentati. Burime pranë grupit hetimor bënë dje me dije për "Gazeta Shqiptare" se, në sajë të deklaratave të marra nga të afërm të 56- vjeçarit, por edhe nga informacionet e marra në rrugë operative, kanë dyshime se Hyka mund të jetë kërcënuar nga persona, për të cilët është duke u punuar për t'i identifikuar. Sipas të njëjtave burime, u pohua se kohët e fundit, që kur Tofik Hyka ishte kthyer nga Franca, ku ai jetonte me familjen e tij, lëvizte i shoqëruar nga një ose më shumë persona. Kjo pasi, sipas burimeve, 56vjeçari i ruhej ndonjë konflikti apo ndonjë ngjarjeje të rëndë që mund t'i ndodhte. Ish- pronari i fabrikës së tullave në Vorë u qëllua me 4 plumba paraditen e së mërkurës, teksa ndodhej i ulur në verandën e një lokali nën shoqërinë e një mikut të tij. Ngjarja ndodhi pranë stadiumit "Selman Stërmasi", ku dy prej plumbave e prekën atë në kokë e në trup, afër zemrës. Ndonëse përveç të afërmve dhe dëshmitarëve okularë, policia ka shoqëruar për të marrë në pyetje edhe një numër të lartë personash si të dyshuar, apo dhe që mund të kenë dijeni për krimin, ende nuk ka ndonjë të arrestuar për ngjarjen e rëndë. Autorët që qëlluan biznesmenin ishin dy persona që lëviznin me motor. Burimet e lartpërmendura shtuan më tej, se është e vështirë identifikimi i tyre për shkak se ata kishin skafandra në kokë.
TË AFËRMIT
Burimet thanë se dëshmia më me vlerë për hetuesit pritet të jetë ajo e vetë biznesmenit 56- vjeçar, i cili ndodhet në gjendje të rëndë shëndetësore. Ndërsa, të afërm të tij kanë rrëfyer në polici se nuk kanë pasur dijeni për ndonjë konflikt të mundshëm që ai mund të ketë pasur kohët e fundit. Sipas tyre, Tofiku, edhe më herët kishte shprehur frikën e ndonjë përplasjeje të mundshme që mund t'i ndodhte me personat me të cilët ai ka pasur konflikte.
KAMERAT E SIGURISË
Grupi hetimor ka këqyrur jo vetëm kamerat e lokalit ku ndodhi ngjarja, por edhe disa kamera të tjera sigurie të vendosura përgjatë kësaj zone dhe në rrugët që të çojnë për te "Komuna e Parisit". Sipas burimeve, nga kamerat vihen re dy persona që lëvizin me motor, të veshur me rroba të errëta dhe me skafandra në kokë. Për këtë fakt, burimet sqaruan se janë duke përdorur metodat specifike të hetimit, për të bërë identifikimin dhe vënien e tyre në pranga, pasi vetëm me anë të kamerave, identifikimi i tyre është i vështirë.
Pista kryesore e hetimeve vijon të jetë ajo e ndonjë konflikti të mëparshëm, për shkak të biznesit që Tofik Hyka ka pasur. Për këtë, hetuesit janë duke verifikuar disa raste ku bëhet fjalë për disa borxhe në shuma të konsiderueshme parash, që Hyka ka pasur në kohën që ishte pronar i fabrikës në Vorë. Mësohet se Hyka ishte detyruar ta mbyllte fabrikën e tullave për shkak të borxheve të shumta dhe problemeve që ai kishte me pagesat e punëtorëve. Ndërkaq, burimet e lartpërmendura sqaruan se do të kërkojnë informacion tek autoritetet e huaja nëse Hyka ka pasur ndonjë konf- likt të hapur në Francë. Po sipas tyre, përcaktimi i motivit të ngjarjes është tejet i vështirë, për faktin se konfliktet e tij kanë nisur që në vitin 1995, me vrasjen e Dritan Avdulit, i njohur si i forti i Shijakut, vrasje kjo e cila u pasua edhe me një sërë ngjarjesh të tjera.
MJEKËT
Dy mjekë të Spitalit të Traumës në Tiranë pohuan dje për Gazetën se 56- vjeçari ndodhet në gjendje kritike për jetën dhe se që në momentin e parë të mbërritjes së tij, e kanë mbajtur në terapi intensive. Sipas tyre, i plagosuri ka shfaqur kriza të forta dhe do t'i nënshtrohet edhe një ndërhyrjeje tjetër kirurgjikale. Po ashtu, ata pohuan se ndërhyrja e dytë është e vështirë për t'u bërë për shkak të hemorragjisë së shumtë që ai ka pasur.