Prokuroria kërkon 9 vite burg për ish- kryetarin e Bashkisë Vlorë
Shpëtim Gjika akuzohet për 3 vepra penale
VLORË - Prokuroria e Vlorës ka kërkuar 9 vite burg për ish- kryetarin e Bashkisë së Vlorës, Shpëtim Gjikën. Sipas organit të akuzës, Gjika akuzohet për "Shpërdorim detyre", "Ndërtim të paligjshëm" dhe "Falsifikim dokumentesh". Hetimet ndaj tij nisën dy vite më parë, kur Gjika mbante postin e Kryetarit të Bashkisë së Vlorës. Në atë kohë, procesi ndaj tij nisi vetëm për akuzën e "Shpërdorimit të detyrës". Shpëtim Gjika u prangos pas akuzave për ndërtimin e një pallati 11katësh në Vlorë, për të cilin është arrestuar edhe një biznesmen, ndërtuesi Artur Haxhi. Në atë kohë, Prokuroria e Përgjithshme njoftoi se Shpëtim Gjika ka bashkëpunuar me të arrestuarën tjetër
AKUZAT
Sipas Prokurorisë së Vlorës, ish- kryetari i Bashkisë së Vlorës, Shpëtim Gjika akuzohet për tri vepra penale. Konkretisht, për "Shpërdorim detyre", "Ndërtim të paligjshëm" dhe "Falsifikim dokumentesh".
Doriana Sulaj, duke lëshuar dokumente me përmbajtje të falsifikuar, që më pas kanë sjellë ndërtime të paligjshme në qytetin bregdetar. Prokuroria tha se gjithçka ka nisur pas kallëzimit të qytetares S. Osmani, kur dhe është regjistruar procedimi penal nr. 1264, që i përket vitit 2014.
PRETENCA E PROKURORISË
Ditën e djeshme, në pretencën e prokurorisë thuhej se në përfundim të shqyrtimit gjyqësor të procedimit penal nr. 1264 të vitit 2014, Prokuroria pranë Gjykatës
së Shkallës së parë Vlorë kërkoi: Dënimin e të pandehurit Shpëtim Gjika me 9 vite burgim, për kryerjen e veprave penale të parashikuara nga nenet 186/ 3 e 25, 248, 199/ a/ 2 e 25 dhe 301 të Kodit Penal; dënimin e të pandehurës Doriana Behari ( Sulaj) me 6 vite burgim, për kryerjen e veprave penale të parashikuara nga nenet 186/ 3 e 25, 248 dhe 199/ a/ 2 e 25 të Kodit Penal; dënimin e të pandehurit Artur Haxhi me 6 vite burgim, për kryerjen e veprave penale të parashikuara nga nenet 186/ 2 dhe 199/ a/ 2 e 25 të Kodit Penal; konfiskimin dhe kalimin në favor të shtetit të produkteve të veprës penale. Për këtë, konkretisht bëhet fjalë për: Objektin godinë banimi dhe shërbime 3- 8- 10- 11 kate dhe 1 kat nën tokë në lagjen "Hajro Çakërri" Vlorë ( objekti A), i ndërtuar nga subjekti ndërtues "Turi& M. Z. B" sh. p. k, ndaj të cilit është vendosur masa e sigurimit "sekuestro preventive" me vendimin gjyqësor nr. 66, datë 09.02.2015, të Gjykatës së Rrethit Gjyqësor Vlorë; objektin godinë banimi dhe shërbime 3- 8- 10- 11 kate dhe 1 kat nën tokë në lagjen "Hajro Çakërri" Vlorë, i ndërtuar nga subjekti ndërtues "Turi & M. Z. B" sh. p. k, ndaj të cilit është vendosur masa e sigurimit "sekuestro preventive" me vendimin gjyqësor nr. 263 datë 15/ 04/ 2015 të Gjykatës së Rrethit Gjyqësor Vlorë.