Mesazhi për Metën: Reflekto, riparo figurën e presidentit
Kryeministri u ndalon pushimet deputetëve të rinj deri më 1 gusht. Ngrihen 5 grupe pune "Të kthjellohet, e votuam si president konsensual, jo konfliktual"
Kryeministri e njëherësh kryetari i PS- së, Edi Rama falënderoi dje të gjithë kandidatët e PSsë nëpër rrethe, por njëherësh i ngarkoi ata me punë, duke mos i lënë të pushojnë deri më 1 gusht. Në një takim të zhvilluar në kryeministri, Rama foli edhe për koalicionin me LSI, për të cilin e cilësoi "koalicion me jo pak probleme". Pas falënderimeve edhe për 12 drejtuesit e qarqeve dhe veçanërisht për Gramoz Ruçin, Rama u shpreh: "Lejomëni t'i falënderoj edhe në emrin tuaj sot, partnerët e mandatit që po mbyllet, në radhë të parë për votat që dhanë për reformat tona shtetbërëse, të cilat do t'i thellojmë më tej, me kurajë politike, vendosmëri atdhetare dhe gatishmëri për dialog me opozitën dyngjyrëshe". "Dua të falënderoj ish- bashkëkryetarin e koalicionit, Ilir Metën. Natyrisht jo për gjërat që i çoi edhe njëherë për dreq, me arsyen kronike të mosarsyes së tij, duke e hedhur përsëri në erë projektin strategjik të së majtës së bashkuar, po për çdo kontribut pozitiv e të pamohueshëm që dha në punën e përbashkët", u shpreh Rama. "Po në emrin tuaj, por edhe të deputetëve socialistë që e votuan e s'janë sot këtu, dua t'i lutem sot, publikisht, të reflektojë një orë e më parë e të kthjellohet njëherë e mirë, si presidenti që i mori votat tona për të qenë konsensual, jo konfliktual, për të qëndruar mbi palët e jo për të qenë palë kundër palëve të tjera. Dhe të përqendrohet sa nuk është vonë, tek riparimet e dëmeve të papara në këto 27 vjet, që i bëri figurës së kreut të ri të shtetit gjatë 40 ditëve të fundit", ishte ky mesazhi që Rama i dërgoi ish- aleatit të tij. "LSI- ja përpara Shqipërisë është një vrimë në ujë dhe përjetimi tragjik i daljes së partisë së tij personale nga roli i çelësit për shumicën qeverisëse, nuk duhet në asnjë mënyrë ta damkosë si komike, pa hyrë ende në zyre, figurën e presidentit të zgjedhur të shtetit të shqiptarëve, pa dallim", theksoi Rama. Kryeministri falënderoie dhe ministrat e LSI- së "për bashkëpunimin përgjithësisht korrekt që patëm dhe për çdo kontribut pozitiv që dhanë në arritjet e qeverisë". "Dora jonë e bashkëpunimit për interesat e mëdha të vendit do të jetë e shtrirë për ta e për kolegët e tyre, njësoj si edhe për opozitën kryesore, Partinë Demokratike. Dua ta rikonfirmoj përsëri që marrëveshja politike e 18 majit me Partinë Demokratike do të mbetet për ne, një busull orientuese në marrëdhëniet qeveri- opozitë. Por, në ndërkohë që të dy konkurrentët tanë janë në proceset e tyre të brendshme pas humbjeve në zgjedhje, prioriteti ynë themelor i kësaj faze tranzicioni, deri në formimin e qeverisë së re, do të jetë nxjerrja e mësimeve të këtij mandati përmes një reflektimi shumë serioz", theksoi Rama duke iu referuar PD- së.
QEVERIA
"Skuadra e re qeverisëse do të jetë gati vetëm në fillim të shtatorit dhe askush përveç meje s'ka pse humbet kohë për t'u marrë me këtë punë", u bëri të qartë Rama të gjithë kandidatëve e ishministrave. Ai sqaroi se, "struktura dhe përbërja e qeverisë së re do të shpallen vetëm pas procesit të reflektimit ku po hyjmë sot dhe deri në fund të gushtit, kur do të mblidhet Asambleja jonë Kombëtare". Ndaj Rama i ftoi deputetët të fokusohen tek procesi i ri përgatitor për mandatin e ri, duke organizuar një tur dëgjimor me partinë e me komunitetet zonë për zonë. "Asnjë prej jush nuk duhet të largohet me pushime deri në 1 gusht. E di mirë sa shumë energji keni shpenzuar gjatë muajve të fundit, por askush këtu nuk është marrë me zor, për të bërë detyrën e rëndë të përfaqësuesit të popullit apo të Partisë Socialiste në nivelin e saj më të lartë", u tha Rama kandidatëve për deputetë dhe kryetarëve të PS- së nëpër bashki. Rama njoftoi edhe ngritjen e 5 grupeve të punës që do të kryesohen nga Gramoz Ruçi, Milva Ekonomi, Niko Peleshi, Arben Ahmetaj e Fatmir Xhafaj. Në fund të gushtit në mbledhjen e asamblesë kombëtare do të paraqitet një raport për qeverisjen e PS- së, ndërkohë që Rama udhëzoi që zyrat elektorale në çdo qark do të adaptohen si zyra të deputetëve të grupit të atij qarku. Në fund ai u tha deputetëve se kjo mbështetje e madhe që iu dha populli, "jo vetëm nuk është e pakushtëzuar, por është me kushte të rënda, që po nuk i plotësuam, ta kemi çdo ditë parasysh, do të kemi në zgjedhjet e ardhshme të njëjtin fat që pati në këto zgjedhje Partia Demokratike".