KAMIONI I ' 90- ës RIKTHEHET TE AMBASADA GJERMANE
27
vite pasi Ylli Bodinaku me kamionin që drejtonte, shembi murin e pasmë të Ambasadës Gjermane, për të hyrë aty bashkë me 5.200 shqiptarë, sot në atë vend qëndron një instalacion. Një gjysmë "Skode" përkujton ditën kur shqiptarët i dhanë grushtin e parë të fortë regjimit komunist të Tiranës. "Ishim 38 veta që vramë frikën, jo vetëm unë", - tha dje Bodinaku para mediave, duke shtuar se "unë vrava tmerrin, që do të çaja murin! Ja ku është muri, timoni… Zoti desh që ne të jetonim dhe jetuam. Dhe jam shumë i lumtur që e theva atë regjim".
Në përkujtim të asaj dite, kryetari i Bashkisë së Tiranës, Erion Veliaj dhe ambasadorja gjermane Schütz përuruan instalacionin artistik "Muri", në rrugën "Justin Godart" në Tiranë. Ideatorët e projektit, Eljan Tanini, Gjergji Islami dhe Ana Pekmezi, ngrenë këtë instalacion si një shteg të kujtesës, mbi ngjarjet e 2 korrikut 1990, ku Ylli Bodinaku me kamionin e tij "Skoda LIAZ" kaloi murin rrethues të Ambasadës Gjermane, si dhe ngjarjet që vijuan me vërshimin në ambasada të shqiptarëve, që kërkonin t'i shpëtonin sistemit diktatorial në vend. "Ishin ditë vërtet dramatike ato të korrikut të vitit 1990", - u shpreh ambasadorja Susanne Schütz, dhe kujtoi më shumë se 3.000 shqiptarët të cilët rezistuan për rreth dymbëdhjetë ditë në kushte të vështira në Ambasadën Gjermane. Më 12 korrik 1990, pas negociatave mes qeverisë federale dhe regjimit komunist të asaj kohe, të gjithë u lejuan që të largohen për në Gjermani.
Instalacioni artistik "Muri" përkujton jo vetëm këtë datë historike, por transmeton te brezat e rinj dëshirën e paetur të paraardhësve të tyre për liri dhe demokraci.
"Ideja ishte shumë e vështirë për të nisur diçka të bukur dhe për t'i dhënë Tiranës një ide urbane, ku të gjithë qytetarët, shqiptarë dhe të huaj, të vizitojnë një histori që ka ndryshuar regjimin komunist, duke na sjellë në demokraci", - tha Eljan Tanini.
"Mirënjohja më e madhe i shkon Ylli Bodinakut, ndoshta një nga zërat më të guximshëm dhe një nga personalitetet më të guximshëm të Tiranës së asaj kohe", - tha kreu i bashkisë. "Heroi ishte një njeri i thjeshtë, i cili merrte fuqi nga dëshira për të ndërruar një sistem dhe një regjim", - shtoi ai.
Një instalacion, 27 vite pas 2 korrikut