Lejuan ndërtim pa leje në Tiranë, "shkrihet" komisariati nr. 1 Tiranë, pezullohet shefi

Arrestohet një 51- vjeçare, procedohen 2 inspektorë bashkiakë

TIRANË - Shefi i Komisariatit nr. 1 në Tiranë, Albert Xhaho, shefi i Seksionit të Policimit në Komunitet në këtë komisariat, Nefail Zyka, si dhe patrulla e policisë që mbulon territorin ku bën pjesë zona e "Rrugës së Elbasanit" janë pezulluar nga detyra. Shkak për këtë masë është bërë një ndërtim pa leje te "Rruga e Elbasanit", pranë Parkut të Liqenit Artificial. Sipas policisë, në pranga ka përfunduar Shiqere Hakaj, 51 vjeçe, lindur në Tropojë dhe banues në Tiranë, e akuzuar për ndërtim pa lejen e organeve kompetente në një sipërfaqe ndërtimi ( lavazh) prej 150 m2. Ndërkaq, në njoftimin zyrtar të policisë u bë me dije se u proceduan shtetasit; A. G, 45 vjeç, lindur në Vlorë dhe banues në Tiranë, me detyrë specialist pranë Inspektoratit të Mbrojtjes Territorit, Bashkia Tiranë, si dhe G. P., 29 vjeç, lindur dhe banues në Tiranë, rruga "Sabri Tefiku", me detyrë Inspektor i Kontrollit në terren i Policisë Bashkiake Tiranë. Sipas policisë, procedimi i këtyre shtetasve u bë për veprën penale "Ndërtim pa leje, shpërdorim detyre", pasi dje në vendin e quajtur "Rruga e Elbasanit", pranë Parkut të Liqenit Artificial, shtetasja Shiqere Hakaj ka kryer ndërtim pa lejen e organeve kompetente në një sipërfaqe ndërtimi ( lavazh) prej 150 m2. Ata akuzohen për veprën penale "Ndërtim pa leje" dhe "Shpërdorim detyre". "Po në vijim të veprimeve në lidhje me këtë ndërtim pa leje nga Drejtoria Vendore e Policisë Tiranë dhe Drejtoria e Standardeve Profesionale në Drejtorinë e Përgjithshme të Policisë së Shtetit u morën masa administrative për punonjësit e policisë: përjashtim nga policia i nd/ specialistit të Policimit në Komunitet që mbulon zonën; pezullimin nga detyra e patrullës së policisë që mbulon këtë sektor pranë Komisariatit të Policisë Nr. 1.; pezullimin nga detyra e shefit të Seksionit të Policimit në Komunitet pranë Komisariatit të Policisë Nr. 1.; pezullimin nga detyra e shefit të Komisariatit të Policisë Nr. 1", thuhet në njoftimin zyrtar të policisë. Po në lidhje me këtë vepër penale nga ana e Shërbimit për Çështjet e Brendshme dhe Ankesat janë kryer veprime procedurale penale dhe po vazhdojnë të kryhen veprime të tjera mbi dyshimet për implikim të punonjësve të policisë pranë Komisariatit të Policisë nr. 1, Tiranë, të cilët kanë marrë dijeni apo nuk kanë kryer detyrat funksionale sipas procedurave standarde të punës.