Përfundon rikonstruksioni i shkollës "E Kuqe"
Veliaj: 3 mijë bursa për nxënësit me 10- ta
Këtë
vit të ri shkollor, 1 mijë nxënësit e shkollës "E Kuqe" do të mësojnë në ambiente të rikonstruktuara si dhe studimi do të bëhet vetëm me një turn. Te kjo shkollë për vite me radhë kanë kryer mësimin edhe nxënësit e shkollës "Hoxha Tahsim", e cila ka qenë jashtë funksionit, por tashmë është drejt fazës finale për të çelur dyert sërish. Kryetari i Bashkisë së Tiranës, Erion Veliaj, i pranishëm në përurimin e shkollës "E Kuqe" u shpreh se viti i ri mësimor do ta gjejë Tiranën me 4 shkolla të reja, çka do të ndikojë në uljen e ngarkesës në shkollat ekzistuese dhe rritjen e nivelit të mësimdhënies. "Këtë vit do të nisë shumë shpejt projekti madhor për ndërtimin e 16 shkollave të tjera, prandaj për të mirën e Tiranës të heqim nga fjalori mësimin me dy turne", - theksoi Veliaj. Kryebashkiaku bëri me dije se shkollat e reja që po ndërtohen nuk do kenë vetëm infrastrukturë të re, por edhe mësues më të mirë, pasi po punohet që mësimdhënësit që dalin të parët në konkurse të japin mësim në këto shkolla. Këtë vit drejtorët nuk do të lejohen të bëjnë regjistrime mbi kapacitetin e lejuar, në mënyrë që të ruhet cilësia e mësimdhënies dhe të shpërndahet ngarkesa nga shkollat ekzistuese. "I kam kërkuar Drejtorisë Arsimore që asnjë shkollë të mos e kalojë kapacitetin, sidomos tani që kemi shkollat e reja ' Hoxha Tahsim', ' Betim Muço' në Kombinat dhe ' Ardian Klosi' te Bregu i Lumit", - tha kryebashkiaku. Veliaj deklaroi gjithashtu, se këtë vit Bashkia e Tiranës do të japë 3000 bursa për të gjithë nxënësit me të gjitha notat 10- ta.