Ponari: Konstantinides të respektojë kontratën
Presidenti i Federatës së Basketbollit i kundërvihet qipriotit pas deklaratave të këtij të fundit Por njëshi i basketbollit akuzon për mungesë fondesh
Basketbolli shqiptar nuk po kalon një mo ment të mirë, teksa paraqitjes së dobët të Kombëtares kuqezi në paraeliminatoret e Botërorit 2019 iu shtuan edhe akuzat e trajnerit Antonis Konstantinides për mungesë organizimi. Qiprioti ka akuzuar se, përveç trajnerit i është dashur të bëjë edhe rolin e masazhatorit apo dhe shoferit të taksisë, akuza të rënda këto në drejtim të Federatës Shqiptare të Basketbollit. Presidenti i këtij institucioni, Avni Ponari ka bërë të ditur se trajneri nuk ka bërë asgjë më shumë sesa detyra e tij. "Duhet të theksoj se trajneri ka bërë vetëm detyrën e tij, asgjë më shumë nga ato që pretendon. Sigurisht që në vitin e dytë të punës së tij ka pasur më shumë probleme, dhe kjo lidhet me sjelljen e sportistëve. Megjithatë ne kemi folur dhe unë pres që ai të respektojë kontratën deri në fund të 2017- ës. Për sa i përket faktit që nuk e duam Kombëtaren, ka të drejtë, pasi pjesëmarrja e tifozëve në pallatin e sportit ka qenë e pakët në përkrahje të ekipit". Sigurisht që problemet në sportin e basketbollit janë të mëdha, dhe gjithçka lidhet me mungesën e financave që duhet të japë shteti për këtë sport. Ponari bën një krahasim të situatës me basketbollin në Kosovë, ku i bën thirrje shtetit të kthejë vëmendjen me investime konkrete në çdo fushë të sportit. "Sigurisht që nuk mund të flasësh për basketboll kur ne si federatë e kemi grandin vjetor 80 mijë euro, ndërkohë që vetëm ekipi i Sigal Prishtinës ka buxhetin vjetor 800 mijë euro. Në Kosovë 30% e taksave shkojnë për sportin, ndërkohë që këtu çdo qeveri nuk ka menduar aspak për sportet e tjera përveç futbollit".
AKUZAT
Antonis Kostandinidhes dha dorëheqjen pas paraeliminatoreve të Botërorit 2019. Në një intervistë për "Top Channel", ai ka folur gjatë për atë çfarë ndodh me basketbollin shqiptar, duke demaskuar drejtuesit e tij për organizimin mediokër. "Ndeshja me Holandën ishte kulmi i problemeve të shumta që kishim si skuadër për- faqësuese e Shqipërisë. Treguan nivelin e basketbollit shqiptar në përgjithësi. Nuk është justifikim, por or- ganizimi i punës këtu lë shumë për të dëshiruar në çdo drejtim. Kam bërë edhe taksistin për të mirën e punës, si dhe punë të tjera. Shumë lojtarë shqiptarë që luajnë jashtë e refuzojnë Shqipërinë, pasi i dinë problematikat këtu. Z. Ponari më besoi 50% dhe jo 100%, pasi dëgjonte këshilltarët e tij. Nuk keni asnjë lidhje me Kosovën në basketboll, jeni shumë prapa në çdo drejtim. Lojtarët janë në punë dhe stërviten disa orë në javë. Ky nuk është profesionalizëm", - tha mes të tjerash trajneri i dorëhequr Kostandinidhes.