Aksioni i opozitës, Basha nis takimet me aleatët
Takimi, koordinimi i të gjithë forcave opozitare në Kuvend Zgjedhja e Ruçit, Mediu: S'ka skenar për bllokim
Reforma zgjedhore dhe ajo kushtetuese do të jenë në qendër të aksionit politik të opozitës me nisjen e sesionit të ri parlamentar. Përpara se maxhoranca e opozita të nisin nga puna për këto dy reforma që janë pjesë e marrëveshjes së 18 majit, kryetari i Partisë Demokratike, i sapokthyer nga Kophenhageni ku mori pjesë në Asamblenë e Partive Popullore, e ka nisur sezonin e ri politik në takime me aleatët. Basha ka biseduar përreth një orë me kryerepublikanin Fatmir Mediu mbi prioritetet e opozitës në këtë legjislaturë, të cilat fokusohen te Kodi Zgjedhor dhe reforma kushtetuese. "Patëm një takim pas pushimeve. Diskutuam gjerësisht për angazhimet e deputetëve të opozitës në parlament dhe koordinimin e të gjithë forcave opozitare në veprimin opozitar të djathtë. Folëm edhe për pritshmëritë dhe zhvillimet që kanë të bëjnë me reformën zgjedhore dhe kushtetuese, që kanë nevojë për një angazhim të të gjithë nivelit të ekspertëve brenda opozitës para se të diskutojmë për marrëdhënien me qeverinë", deklaroi kreu i PR- së. Z. Mediu komentoi qeverinë e re, ndërsa tha se kabineti i Edi Ramës nuk sjell asgjë, përveçse do t'u rikthehet skemave të korrupsionit. "Qeveria, një histori e vjetër me pazare të reja. Kur flasim për qeveri të vogël nuk është çështje numrash, por autoriteti. Përqendrimi i autoritetit në duart e kryeministrit dhe të disa njerëzve, në mënyrë të qartë është marrja e së drejtës së qytetarëve, individëve apo bizneseve në duart e një grupi njerëzish. Shqipëria për fat të keq po rrëshqet çdo ditë e më shumë në një kontroll të qeverisë mbi çdo pushtet dhe të drejtat e individit. Aleati i Partisë Demokratike, Fatmir Mediu, tha se opozita nuk ka asnjë skenar për bllokimin e seancës së Kuvendit. "Ka iniciativa për protesta dhe diskutime, por nuk ishte pjesë e diskutimit sot ( dje)", tha z. Mediu. Por, mësohet se kundër zgjedhjes se Gramoz Ruçit në krye të parlamentit dhe Fatmir Xhafajt si ministër i Brendshëm do të protestojnë ish- të përndjekurit politikë, forumi rinor i Partisë Demokratike, por do të mbështeten edhe nga disa deputetë demokratë. Sa i përket reformës zgjedhore, Mediu shprehet kundër propozimit të bërë nga nënkryetari i demokratëve, Edmond Spaho, për votimin me detyrim në zgjedhje. "E djathta bazohet mbi individët dhe liritë e individit dhe çdo gjë që bie ndesh me këtë koncept për mendimin tim është e papapranueshme", u shpreh kreu i PR- së, Fatmir Mediu, pas takimit me kreun e PD- së, Lulzim Basha.
Kundër zgjedhjes së Gramoz Ruçit në krye të parlamentit dhe Fatmir Xhafajt si ministër i Brendshëm do të protestojnë ish- të përndjekurit politikë, forumi rinor i Partisë Demokratike, por do të mbështeten edhe nga disa deputetë demokratë.