Shkëlzen Berisha nuk paraqitet në seancë, gjykata mbyll çështjen
Romeo Kara: Strategjia e tyre për të më frenuar në misionin tim s'funksionoi Paditi për shpifje juristin e OSSH- së
Gjykata e Tiranës ditën e djeshme mori vendimin për mbylljen e çështjes mes Shkëlzen Berishës dhe juristit të OSSH, Romeo Kara. Shkëlzen Berisha kishte ngritur padi për shpifje kundrejt juristit, pasi ky i fundit kishte dëshmuar para komisionit hetimor parlamentar për skandalin CEZ dhe kishte dhënë deklarata në media, ku implikonte Shkëlzenin si sekser të marrëveshjes me çekët. I pari që reagoi në lidhje me këtë vendim ishte juristi Kara. Në rrjetin e tij social "Facebook", ai shkruante se e konsideron padinë për shpifje si një mjet dhe mënyrë mjerane, kërcënimi dhe detyrimi nga klani ' Berisha' dhe sistemi gjyqësor në funksion të tij. Pas kësaj, i menjëhershëm ishte edhe reagimi i Shkëlzen Berishës, i cili shkruante në "Facebook" se beteja e tij ligjore nuk mbyllet me kaq, për këtë arsye ka depozituar një padi të re.
REAGIMI I ROMEO KARA
"Sot, pinjolli i klanit Berisha, Shkëlzen Sali Liri Berisha, si dhe avokati i tij, nuk u paraqitën në seancën gjyqësore, të iniciuar prej tyre, kundër meje, me akuzën e shpifjes. Si rrjedhim, me qenë se ata, përveçse nuk u paraqitën vetë, por nuk paraqitën edhe ndonjë kërkesë për shtyrje, gjykata mori vendimin për mbylljen e çështjes. Kjo tërheqje, nuk ka ndonjë vlerë tjetër për mua, përveçse asaj të fitores së radhës. Strategjia e klanit kriminal Berisha, për të më frenuar mua në misionin tim, nuk funksionoi. Unë e konsiderova padinë për shpifje, si një mjet dhe mënyrë mjerane, kërcënimi dhe detyrimi, nga klani Berisha dhe sistemi gjyqësor në funksion të tij. Ajo padi u ngrit me shumë zhurmë dhe pompozitet, vetëm për të bërë të mundur tërheqjen time, si dhe zhvlerësimin e investigimeve dhe dëshmive të mia, lidhur me aferat, ku është zhytur kokë e këmbe, klani Berisha dhe jo vetëm. Përgjigja ime ka qenë e qartë dhe pa ekuivok se unë nuk tërhiqem dhe pjesë e kësaj lufte do të jetë edhe lufta me veglat më të ndyra të klanit Berisha, që janë gjyqtarët dhe prokurorët e korruptuar. Në përgjigje të padisë mjerane berishiane, unë përgatita dhe dorëzova kallëzimin penal në Prokurorinë e Përgjithshme, lidhur me veprat penale të konstatuara nga unë në procesin e privatizimit të OSSH- së, ku Berisha Senior, është përgjegjësi kryesor. Pra, de facto, padia e Berishës Junior, përkundrejt meje, nuk arriti asnjë nga qëllimet e saj. Përkundrazi, unë kam qenë tejet i motivuar, për të ecur edhe më i fortë, më i vendosur dhe më i saktë në rrugën time."
REAGIMI I SHKËLZEN BERISHËS
"Avokati me të cilin përfaqësohem në gjyqin me urithin e Ramës, për shkak të një keqkuptimi të lindur nga njoftimi verbal, është paraqitur në seancën e sotme 20 min. me vonesë. Për këtë arsye gjykatësi e ka parë të udhës të mbyllë çështjen pa u futur aspak në themelin e saj. Urithi i Ramës shpreson se do shpëtojë nga përgjegjësia penale me procedurë, por po sot është depozituar padia e re, për të njëjtën shpifje, për të njëjtën vepër penale, me të njëjtat argumente. Procesi i ri do jetë njëlloj me të parin dhe do i japë dënimin ligjor shpifësit, të cilin nuk ka procedurë që mund ta shpëtojë." Ndërkohë, ish- juristi i OSSH, Romeo Kara, shkruan se Shkëlzeni nuk është paraqitur në gjyq këtë të enjte dhe për rrjedhojë gjykata ka pushuar çështjen.