Radarët e instaluar në Himarë, prej 3 vitesh jashtë funksionit
Policia: Kapin vetëm mjetet e mëdha, jo gomonet. Ja letra e dytë e ministrit Demiraj, drejtuar Kodhelit Shkak, mosfurnizimi me energji elektrike
Që prej 3 vitesh, ra darët e vendosur në Himarë për të kontrolluar mjetet lundruese që kalojnë në det nuk funksionojnë, pasi ka probleme me furnizimin e energjisë elektrike. Ky fakt është bërë me dije nga burime të besuara pranë Policisë së Shtetit. Sipas këtyre burimeve, mësohet se ka shkëputje të herëpashershme të energjisë, madje në këtë qendër të ngritur 8 vite më parë nuk ka as gjenerator. Ndërkaq, burimet theksuan se edhe gjatë kohës që nuk ka probleme me energjinë, radarët nuk arrijnë të kapin mjetet e vogla lundruese si gomone apo skaf, por mund të fiksojnë vetëm mjetet e mëdha, si tragetet dhe peshkarexhat. Nisur nga kjo situatë, Guardia Di Finanza ka rritur monitorimet në brigjet e tyre për të kapur mjetet lundruese që nisen me lëndë narkotike nga vendi ynë. Mësohet se gjatë këtyre viteve, punonjësve në këtë qendër u është kërkuar që të mbajnë shënim çdo luhatje që mund të ketë me energjinë dhe ndonëse institucionet përkatëse janë vënë në dijeni të këtij fakti, asgjë nuk ka ndryshuar. Sakaq, institucionet pjesëmarrëse tek Qendra Ndërinstitucionale Detare e Radarëve ( QNOD) janë: Roja Bregdetare ( Ministria e Mbrojtjes); Policia Kufitare dhe Migracionit ( Ministria e Punëve të Brendëshme); Drejtoria e Përgjithshme Detare ( Kapiteneria e Porteve, Ministria e Transportit dhe Infrastrukturës); Inspektorati Mjedisit ( Ministria e Mjedisit); Drejtoria Peshkimit ( Ministria e Bujqësisë, Zhvillimit Rural dhe Administrimit të Ujërave); si dhe Agjencia Kombëtare Bregdetit ( Ministria e Zhvillimit të Ekonomisë, Turizmit, Tregtisë dhe Sipërmarrjes).
LETRA
Dy ditë më parë, drejtori i përgjithshëm i Policisë së Shtetit, Haki Çako denoncoi mosfunksionimin e radarëve, gjë që sipas tij pengonte punën e policisë për kapjen e ngarkesave me drogë. Pas kësaj, i menjëhershëm ishte edhe reagimi i Ministrisë së Mbrojtjes, ku thuhej se ky sistem vëzhgon e monitoron hapësirën detare të Republikës së Shqipërisë 24 orë në 7 ditë të javës dhe se çdo pretendim tjetër është i pavlerë, i pavërtetë dhe dashakeqës. Por, në një letër që ministri i Brendshëm, Dritan Demiraj i dërgonte ministres së Mbrojtjes Mimi Kodhelit, ai ngrinte dyshimet se në një operacion antikanabis më 7 gusht të këtij viti, punonjësit e kompanisë që ofrojnë shërbimin fikën qëllimisht sinjalin në sistem. Po sipas tij, nga 50 operacione antikanabis të ndërmarra në det nga Policia e Shtetit, ku janë kapur 51 mjete lundruese, vetëm për 4 prej tyre është dhënë alarmi. Më tej, ai thekson faktin se sistemi nuk iu përgjigjet nevojave operacionale për kontrollin dhe mbikëqyrjen e kufirit detar, pasi nuk e mbulon të gjithë hapësirën me vëzhgim dhe si rezultat krijohen kënde të vdekura që shfrytëzohen nga trafikantët, sidomos në atë zona të klasifikuara me risk. "Nuk ka kamera të integrueshme në sistem, të cilat të jenë në gjendje të afrojnë objekte, të përcaktojnë largësitë apo objektet midis tyre", shkruan më tej Demiraj. Në këto kushte, duke e vlerësuar gjendjen si problematike, ministri Demiraj kërkon nga kolegia Kodheli të marrë masa për përmirësimin e parametrave të sistemit, pasi vetëm në këtë mënyrë do të rritet efektiviteti i Policisë së Shtetit në luftën antikanabis Në lidhje me shqetësimin e ngritur nga ana e Çakos për mosfunksionimin e radarëve, kryeministri Rama, i pyetur në një takim me gazetarët tha: "Nuk diskutohet që jemi në një fazë përmbyllëse të kësaj beteje dhe që ne faktikisht e kemi fituar këtë betejë. Të dhënat janë kokëforta. Propaganda është propagandë. Përpjekja që bëhet për ta shpërndarë gjithandej këtë lloj propagande është një përpjekje, të themi, pak e turpshme".