Vrasja e kamerierit shqiptar në Belgjikë, dyshohet se u krye për hasmëri
Kreshnik Gjini, nipi i ish- drejtorit të OSHEE- së
Pas
vrasjes së shqiptarit Kreshnik Gjinit në Belgjikë, edhe policia e vendit tonë ka nisur hetimet për të bashkëpunuar me autoritetet e huaja. Burime të sigurta pranë Policisë së Shtetit bënë dje me dije se kanë dyshime të forta se vrasja e të riu është kryer për shkak të hakmarrjes. Gjini dyshohet të jetë i përfshirë në trafikun e lëndëve narkotike dhe për këtë arsye prokuroria belge u ka kërkuar homologeve shqiptarë që të zbulojnë të gjitha pasuritë e paluajtshme të investuara në Shqipëri. Mësohet se viktima ishte nipi ( djali i motrës) i ish- drejtorit të OSHEE, dega Rrëshen Sajmir Jakut, i vrarë në shtator të vitit të shkuar në ambientet e një lokali në qendër të Rrëshenit. Por, duket se kjo vrasje u pasua edhe më sërë atentatesh të tjera. Në nëntor të vitit të shkuar, në Milano u ekzekutuan dy kushërinjtë Agron dhe Alban Lleshaj. Edhe për këtë krim, dyshimi kryesor ishte gjakmarrja. Porositësi i këtyre vrasjeve dyshohet të ketë qenë nga ish- rivali në trafikun e lëndëve narkotike, Gasper Reçi. Ky i fundit u qëllua për vdekje me katër plumba në 28 prill të këtij viti. Sipas hetimeve të policisë, mësohet se dy kushërinjtë Lleshaj kanë qenë miq me Sajmir Jakun. Kreshnik Gjini, 31 vjeç u ekzekutua dy ditë më parë në komunën Forest të Belgjikës. Ai u qëllua me dy plumba nga dy persona të maskuar dhe të panjohur. E gjithë ngjarja ndodhi para syve të koleges së tij të punës, Liliane. Viktima punonte kamerier në një lokal në Saint- Denis. Mbrëmjen e së martës, ai mbylli llogaritë e xhiros ditore, kyçi biznesin dhe u largua me kolegen e tij. Këtë të fundit do ta shoqëronte me makinë në shtëpi, pasi nuk kishte mundur të arrinte tramvajin e fundit mbrëmjen e së martës. Pas ngjarjes, mikesha e tij ka rrëfyer në polici ekzekutimin e mikut në sy të saj. Në rrjetin social "Facebook", miqtë e 31- vjeçarit kërkojnë ndihmë financiare që trupi i pajetë i shqiptarit të prehet në Shqipëri.