Meta: Jemi krenarë, trashëgimia shqiptare, dinjitoze në Evropë

Presidenti viziton Beratin, shoqërohet nga Kumbaro

Presidenti

Ilir Meta viz itoi dje Beratin në "Ditën Kombëtare të Trashëgimisë Kulturore". E pranishme ishte edhe ministrja e Kulturës, Mirela Kumbaro, të cilën Meta e falënderoi "për zgjidhjen konsensuale" për të qenë së bashku në Berat. Fillimisht, Presidenti Meta së bashku me ministren e Kulturës, Mirela Kumbaro Furxhi u ndal në Muzeun "Onufri", të shoqëruar edhe nga kryetari i Bashkisë, Petrit Sinaj, përfaqësues të ndryshëm të pushtetit vendor e të bashkësive fetare si dhe deputetë të qarkut dhe qytetarë të shumtë beratas. Më pas Presidenti Meta vizitoi muzeun etnografik, ku u njoh me historinë e themelimit të saj, objektet kryesore si dhe vlerat historike e arkitekturore të monumenteve të shumta e të lashta të qytetit të Beratit. Në fjalën e tij përshëndetëse, Presidenti i Republikës u shpreh: "Në këtë ditë feste, ne sot jemi bashkë me të gjithë shtetet evropiane duke ekspozuar vlerat më të arrira të traditave monumentale, historike dhe kulturore. Sot të gjithë popujt e Evropës, pikërisht në ditën tonë të kulturës kombëtare, festojnë njëkohësisht dhe Ditën e Trashëgimisë Evro- piane. Në këtë mënyrë, Evropa e bashkuar tregon se është shumë e fortë dhe shumë e bukur në diversitetin e traditave shumëngjyrëshe të çdo kombi. Ne shqiptarët jemi krenarë përpara historisë së kulturës evropiane, pasi historia dhe trashëgimia shqiptare është pjesë dinjitoze e kësaj kulture evropiane sot", tha presidenti. "Sigurisht nuk ka qenë dhe nuk është e lehtë për një popull si i yni të ruajë doket, zakonet dhe monumentet e kulturës përballë presioneve, pushtuesve dhe furive të kohës. Prandaj do të doja të theksoja se më shumë se të qenit privilegj, fakti që kemi qytete me të tillë trashëgimi si Berati, Gjirokastra, etj., duhet ta pranojmë në radhë të parë si obligim dhe detyrë për t'i ruajtur dhe përsosur ato akoma më tej", tha Meta.