I zhvati 60 milionë lekë drejtorit të Postës, gjykata lë në burg "Mona Lizën"
Enertila Beqja: Jam e pafajshme, Barush Ahmetaj më mbajti pensionin e nënës Prokuroria: 27- vjeçarja kontaktoi në ' FB' me emrin Elona Gjoka
Epabesueshme! "Mona Liza" nga Manëza që i mori zemrën dhe i zhvati 60 milionë lekë të vjetra 30- vjeçarit Barush Ahmetaj habiti mëngjesin e djeshëm me pamjen e saj. 27vjeçarja Enertila Beqja nuk kishte asgjë të ngjashme me foton e aktores që kishte në profilin e saj në "Facebook", me të cilën joshi keqaz drejtorin e Postës në Manëz. E kërrusur, e veshur me një palë streçe e mbi to një fustan vishnje, me një palë atlete pa lidhëza, ajo u ul në një karrige në kafazin e hekurt. E akullt dhe moskokëçarëse, vajza që akuzohet për mashtrim me pasoja të rënda financiare për asnjë moment nuk u step, nuk iu drodh zëri, por deri në fund këmbënguli se është e pafajshme. "Nuk kam lidhje me akuzat për mashtrim", deklaroi ajo para togave të zeza të qytetit bregdetar. Edhe pse prokuroi i çështjes dhe gjykatësi këmbëngulën që të pranonte se pas fotos së vajzës bionde qëndronte ajo vetë dhe se pas mashtrimit spektakolar fshihej loja e saj djallëzore që prej vitit 2015 me Barush Ahmetajn, 27- vjeçarja asnjë herë nuk u lëkund në qëndrimin e saj. Pavarësisht se e dridhura e lehtë e duarve herë pas here tregonte se ishte në vështirësi të madhe. Por, jo vetëm kaq. Enertila Beqja akuzoi 30- vjeçarin Ahmetaj si i ka mbajtur pensionin e KEMP- it të nënës, e nuk ia ka dhënë akoma për muajin qershor. Gjatë seancës, prokurori i çështjes mbajti një raport të detajuar. Ai tha se Beqja i paraqitej të riut në "Facebook" me emrin Elona Gjoka dhe me këtë profil i ka zhvatur shumën e madhe të lekëve. "Prokuroria disponon prova e fakte që prej vitit 2015- 2017, ku profili me emrin Elona Gjoka kishte zënë miqësi me Barush Ahmetajn. Pasi zuri miqësi me 30- vjeçarin, ajo i tha që ishte nga Manëza dhe jetonte me familjen në Milano të Italisë. Fillimisht Elona ( Enertila Beqja) i kërkoi Barushit një palë kolltukë që t'ia çonte tezes në fshatin Manëz, meqë ishte në gjendje të keqe ekonomike. Barushi në celularin e tij si provë për prokurorinë ka paraqitur foto nga kolltukët si dhe faturën e tyre. Më pas vijuan dhuratat me blerjen e dy televizorëve plazmë, aparat ' Dixhitalbi', lavastovilje, sobë druri, pistë vrapi për palestër, bizhuteri të florinjta nga më të ndryshmet, dy "iPohne 6" dhe "7 plus". Dhurata këto, të cilat ishin të fotografuara dhe të dërguara tek adresa me emrin Elona Gjoka, ku kjo e fundit jepte aprovimin nëse i duheshin ato dhurata me atë x stil apo dhe ngjyrën përkatëse dhe nuk nguronte që të referonte se çfarë i pëlqente. Ndërkohë, një dhuratë ishte blerja e motorit dhe targimi në emër të Myrteza Beqajt, babait të vajzës", tha përfaqësuesi i akuzës. Sipas prokurorit, Barush Ahmeti është ndjerë i kërcënuar, pasi vajza me emrin Elona Gjoka i thoshte atij se babai kishte vrarë dhëndrin, burrin e motrës. Në fund të seancës, trupi gjykues vendosi masën e sigurisë "arrest me burg" ndaj 27- vjeçares, e cila e priti e qetë vendimin dhe pa kontestime.