Maratona e Tiranës pret 2500 vrapues
Luiza Gega, fituese e garës në 21 km, Bledar Suxha kryeson kategorinë "WE Too" Veliaj merr çmimin e mirënjohjes për organizimin Kampioni shqiptar i Ballkanit merr pjesë në Maratonën e Tiranës
Ditën e djeshme u zh villua për të dytin vit radhazi Maratona e Tiranës, ku morën pjesë 2500 vrapues nga 40 vende të ndryshme të botës. Ky event u organizua nën kujdesin e Bashkisë së Tiranës dhe Federatës Shqiptare të Atletikës. Nisja e këtij aktiviteti sportiv u bë nga sheshi "Nënë Tereza" dhe përshkoi pikat më kryesore të kryeqytetit. Edhe kryebashkiaku, Erion Veliaj u bë pjesë e kësaj maratone dhe deklaroi se ky event konsiderohet si një ngjarje fantastike. "Ka qenë një përgatitje fantastike. Shpresoj të dalë më mirë se vjet, megjithatë dua që gjithashtu t'u japim një duartrokitje atyre që s'janë këtu, por janë 660 vullnetarë, janë 400 policë, janë plot zjarrfikës, shërbimet emergjente, plot pastrues dhe mirëmbajtës që kanë bërë një punë fantastike", - tha ai para nisjes së garës. Policia Bashkiake e Tiranës, në bashkëpunim me policinë Rrugore morën një sërë masash për sigurinë dhe mbarëvajtjen e maratonës, ku u angazhuan rreth 300 punonjës. Ditën e djeshme janë evidentuar dhe ndëshkuar plot 78 drejtues automjetesh, pasi kanë shkelur rregullat.
Kategoritë pjesëmarrëse në maratonë ishin "Fun Run", "We too", "Half Marathon" dhe "Tirana 10K". Pjesë e kategorisë "Fun Run" ishin nxënësit e shkollave të Tiranës, të cilët vrapuan në rrugët e qytetit duke mbartur një mesazh sensibilizues: "Edukimin e brezave nëpërmjet sportit". Kategoria "We Too" mirëpriti të gjithë individët me aftësi ndryshe, duke i parë si shembull motivimi. Ndërsa, "Half Marathon" ( 21, 0975 km) dhe "Tirana 10K" ( 10 km), ishte e hapur për të gjithë qytetarët mbi moshën 18 vjeç, shqiptarë dhe të huaj, profesionistë dhe amatorë. Abel Kibet Rop dhe Luiza Gega ishin fituesit e garës në 21 km, Edwin Cheruiyot Melly dhe Olena Popova ishin fituesit e garës në 10 km, dhe Bledar Suxha u shpall fitues i garës "We Too" ( gara për personat me aftësi të kufizuara). Ashtu siç edhe kishte premtuar pak ditë më parë publikisht, kryetari i Bashkisë së Tiranës, Erion Veliaj arriti të thyejë rekordin e tij të një viti më parë. Ai garoi në kategorinë 10 km, të cilën e përshkroi për 59 minuta e 05 sekonda. Pjesëmarrës
në Maratonën e Tiranës ka qenë edhe 23- vjeçari nga Lezha David Nikolli, i cili është shpallur kampion Ballkani në atletikë për garat 3000 metra. Ai tregon për "Gazeta Shqiptare" se ditën e djeshme u rendit i katërti dhe se lumturia e tij më e madhe është të përfaqësojë Shqipërinë në kompeticionet ndërkombëtare. "Prej 8 vitesh jetoj në Itali dhe deri më tani kam arritur të jem i pari në 4 kampionate ndërkombëtare të atletikës. Në vitin 2018 do të marr pjesë në kampionatin europian, që do të zhvillohet në Berlin të Gjermanisë, dhe po në këtë vit do të kem mundësinë të përfaqësoj vendin tim në Kampionatin e Olimpiadës në Tokio të Japonisë", - tregon atleti për "GSH". Gjithsesi, ndonëse nuk arriti të marrë një çmim si garues në maratonë, Veliaj u vlerësua me një çmim të veçantë nga Federata e Atletikës për iniciativën dhe organizimin e maratonës. Ishte presidenti i Federatës Shqiptare të Atletikës, Gjergj Ruli ai që i dorëzoi kryebashkiakut çmimin e mirënjohjes për kontributin e dhënë në or- ganizimin dhe mbarëvajtjen me sukses të kësaj maratone. "Unë e theva rekordin tim, nuk mora ndonjë çmim për rezultat të lartë, por unë besoj se është si puna e Tiranës: rëndësi ka që çdo vit të jemi pak më mirë se vitin që kaloi. Nëse vazhdojmë me këtë mënyrë, besoj se do e kemi qytetin e ëndrrave tona", - theksoi Veliaj gjatë marrjes së çmimit.