Monitorimi i AKU, mbyllen 28 thertore në vend pasi nuk plotësonin standardet
Në pranga 2 inspektorë, abuzim me detyrën
Gjatë
tri ditëve të fundit, 28 thertore në vend janë mbyllur pasi nuk plotësonin kushtet higjienosanitare dhe detyrimet e tjera të përcaktuara. Në kuadër të nismës për reformimin e plotë të gjithë zinxhirit të sigurisë ushqimore në vend, Autoriteti Kombëtar i Ushqimit ka kryer 29 inspektime në lidhje me kushtet e tregtimit të mishit dhe therjes së kafshëve. "Janë mbyllur 28 pika therjeje në të gjithë vendin, ndërsa për një subjekt është lënë detyra për plotësimin e disa kushteve. Të gjitha rastet e mësipërme të cilat janë mbyllur nuk garantojnë as minimumin e standardeve të parashikuara me ligj", thuhet në njoftimin e AKU- së. Kështu, pas monitorimit, janë mbyllur 3 pika therjeje në Tiranë, 1 punishte qoftesh dhe 1 pikë e tregtimit të mishit, si dhe 1 është paralajmëruar. Gjithashtu janë mbyllur 4 pika therjeje në qarkun Gjirokastër, 2 në Berat, 2 në Dibër, 1 në qarkun Elbasan dhe 1 subjekt është paralajmëruar. Ndërsa, është ndaluar aktiviteti edhe për 4 thertore në qarkun Fier, 1 në qarkun Lezhë, 1 në qarkun Kukës, 1 në Shkodër, dhe 4 të tjera janë mbyllur nga Drejtoria Rajonale e Qarkut Vlorë. Ndërkaq, pas denoncimit të Drejtorisë së Përgjithshme të AKU- së, dy inspektorë të Drejtorisë Rajonale të AKU- së në kryeqytet janë vënë në pranga nën akuzën "Abuzim me detyrën dhe shkelje të ligjit", pasi kishin licencuar një pikë therjeje në fshatin Baldushk, e cila nuk plotësonte asnjë kriter ligjor. "Autoriteti Kombëtar i Ushqimit garanton se ky nuk është një aksion, por një punë e filluar, e cila përfundon vetëm me reformimin e plotë të gjithë zinxhirit të sigurisë ushqi-
more në vend. Çdo tentativë për të rihapur aktivitetet e mbyllura do të ndëshkohet maksimalisht, ndërsa kujton se në sitën e tij do të jenë të gjitha thertoret dhe njësitë e tjera të tregtimit të mishit", citohet në njoftimin e AKU- së.