Rama: Tahirin e kam mbështetur, por përgjegjësia individuale. Presim të vërtetën

Kryeministri: Shokuese dhe e neveritshme, biseda mes kriminelëve

Kryeministri

Edi Rama e cilësoi "shokuese dhe të neveritshme", atë çfarë ka dalë me përgjimet ku implikohet ish- ministri Saimri Tahiri. "Duam të vërtetën! Sa më parë! Është e neveritshme dhe shokuese çka ka dalë prej bisedave të dy kriminelëve! Saimir Tahirin e njoh prej vitesh dhe kam pasur vetëm fjalë mbështetjeje e inkurajimi për të, si person me qëllime të mira, aftësi dhe integritet", u shpreh dje Rama në një status në "Facebook", ndërsa ishte në Shkup. "Por - shtoi më tej Rama - Shqipëria dhe shqiptarët sot duan e meritojnë të dinë të vërtetën, vetëm të vërtetën dhe asgjë tjetër përveç të vërtetës. Prandaj të gjitha organet ligjzbatuese duhet t'i shkojnë deri në fund e pa humbur kohë kësaj historie, për të hedhur dritë të plotë mbi faktet. Vetë qeveria e re është krijuar për të mos falur e as toleruar këdo qoftë që zgjedh rrugën e krimit në vend të rrugës së Shqipërisë që duam - Me shtet, punë, mirëqenie. Asnjë luhatje. Asnjë rezervë. Asnjë dyshim, lufta jonë me krimin do të vazhdojë në çdo ditë me edhe më shumë forcë. Deri në fund!", theksoi Rama. Ndërsa në përgjigje të komentuesve në ' FB', ai sqaroi se lidhjet me krimin duhet t'i provojë drejtësia, sepse biseda e dy kriminelëve nuk është provë, por një arsye për të kërkuar që të provohet sa e vërtetë është. "Nuk ekziston në demokraci koncepti i një kabineti të lidhur me krimin, sepse përgjegjësia është individuale dhe as kolektive, as shoqërore, as farefisnore!", sqaroi kryeministri.