Prokuroria e Krimeve të Rënda: Të arrestohet Saimir Tahiri!
"Ish- ministri i Brendshëm ka siguruar paprekshmërinë e grupit kriminal" Faktet, udhëtoi 4 herë me "Audin" me Artan Habilaj
Prokuroria për Krime të Rënda kërkon arrestimin e Saimir Tahirit për dy akuza, "Trafikim i narkotikëve" kryer në bashkëpunim, në formë të posaçme të grupit të strukturuar kriminal, parashikuar nga nenet 283/ a/ 2 dhe 333/ a të Kodit Penal të Republikës së Shqipërisë dhe "Korrupsioni pasiv i funksionarëve të lartë shtetërorë ose i të zgjedhurve vendorë", parashikuar nga neni 260 i Kodit Penal. Prokuroria për Krime të Rënda në bazë të të dhënave të përftuara nga hetimet kërkon nga Komisioni i Mandateve në Kuvendin e Shqipërisë dhënien e autorizimit për "arrestimin, heqjen e lirisë dhe kontrollin personal e të banesës" për deputetin Saimir Tahiri, komision i cili vendos sot në orën 11.00 të drejtën apo jo të arrestimit të ish- ministrit. Ndërkaq, pasditen e djeshme drejtuesi i Prokurorisë për Krimet e Rënda, Besim Hajdarmataj, u është drejtuar deputetëve të Kuvendit me gjithë sqarimet pse kërkohet arrestimi i tij, ndërkaq që faktet e mëposhtme sipas burimeve në prokurori, janë vetëm një pjesë e dosjes hetimore ku përmendet emri i ish- ministrit të Brendshëm, Saimir Tahiri.
RRETHANAT
Më datë 17.10.2017 në bazë të të dhënave të bëra publike, Prokuroria pranë Gjykatës së Shkallës së Parë për Krime të Rënda, Tiranë, konformë nenit 287 të Kodit të Procedurës Penale, i cili parashikon se ' Prokurori shënon në regjistër çdo njoftim të veprës penale, që i vjen ose që ka marrë me iniciativën e vet dhe në të njëjtën kohë ose nga momenti në të cilin rezulton, emrin e personit, të cilit i atribuohet vepra penale', ka regjistruar procedimin penal me nr. 313 të vitit 2017 për veprat penale të "Trafikimi i narkotikëve" kryer në bashkëpunim, në formë të posaçme të grupit të strukturuar kriminal, parashikuar nga nenet 283/ a/ 2 dhe 333/ a të Kodit Penal të Republikës së Shqipërisë, "Korrupsioni pasiv i funksionarëve të lartë shtetërorë ose i të zgjedhurve vendorë", parashikuar nga neni 260 i Kodit Penal, në ngarkim të personit në hetim: Saimir Tahiri, i biri i Bashkim dhe i Luiza, i datëlindjes 30.10.1979, lindur në Tiranë dhe banues në Tiranë dhe për veprat penale të ' Trafikimi i narkotikëve' kryer në bashkëpunim, në formë të posaçme të grupit të strukturuar kriminal, parashikuar nga nenet 283/ a/ 2 dhe 333/ a të Kodit Penal të Republikës së Shqipërisë dhe ' Korrupsioni aktiv i funksionarëve të lartë shtetërorë ose i të zgjedhurve vendorë', parashikuar nga neni 245 i Kodit Penal. Për personat në hetim Mosisi Habilaj, i biri i Ciko dhe Zenepe, i datëlindjes 18.01.1978, lindur dhe banues në Vlorë; Florian Habilaj, i biri i Ciko dhe i Zenepe, i datëlindjes 10.11.1980; Artan Habilaj etj. Në lidhje me këto fakte penale dhe për subjektet Moisi Habilaj, Florian Habilaj, Artan Habi- laj, Armand Kocerri, etj. nga Prokuroria Pranë Gjykatës së Shkallës së Parë për Krime të Rënda është zhvilluar hetimi në rang të procedimeve penale me nr. 134 të vitit 2016 dhe 164 të vitit 2017. Konform nenit 79 të Kodit të Procedurës Penale me datë 18.10.2017 Prokuroria pranë Gjykatës së Shkallës së Parë për Krime të Rënda, Tiranë ka vendosur bashkimin e procedimeve penale me Nr. 134 të vitit 2016, 164 të vitit 2017 dhe 313 të vitit 2017 në një procedim të vetëm dhe konkretisht procedimin penal me Nr. 134 të vitit 2016. Sa më sipër, Prokuroria pranë Gjykatës së Shkallës së Parë për Krime të Rënda, Tiranë, në rang të procedimeve të lidhura është kompetente në ushtrimin e ndjekjes penale në raport me rastin konform parashikimeve ligjore të nenit 285 të Ligjit nr. 35/ 2017.
4 UDHËTIMET E TAHIRIT ME HABILAJT FAKTET
Nga ana e autoriteteve italiane të drejtësisë është arrestuar personi në hetim, Moisi Habilaj etj., të dyshuar për kryerjen e veprave penale të ' Trafikimi i narkotikëve', kryer në bashkëpunim, në formë të posaçme në rang të grupit të strukturuar kriminal. Arrestimi i këtij shtetasi është bërë në funksion të hetimeve që autoritetet italiane të drejtësisë po zhvillojnë në lidhje me kapjen dhe sekuestrimin e sasisë prej 3.5 tonësh lëndë narkotike e llojit kanabis sativa. Nga hetimet rezulton se ky shtetas në bashkëpunim me persona të tjerë, të cilët ushtrojnë funksione publike në Republikën e Shqipërisë ka arritur të trafikojë për jashtë shtetit me destinacion Italinë sasi të konsiderueshme lënde narkotike. Si rezultat i veprimeve hetimore të kryera është arritur të zbulohet se personi në hetim, Moisi Habilaj dhe bashkëpunëtorët e tij kanë bashkëpunuar me zyrtarë të lartë të Policisë së Shtetit, ku si person i dyshuar është edhe ish- ministri i Brendshëm, personi në hetim Saimir Tahiri. Personi në hetim, Moisi Habilaj në bashkëpunim me persona të tjerë, duke përfituar nga lidhjet e ngushta me ish- ministrin e Brendshëm dhe kundrejt shpërblimeve kanë arritur të bëjnë të mundur kultivimin e sasive të konsiderueshme të lëndës narkotike, trans- portimin e tyre në mënyrë të organizuar me destinacion jashtë vendit. Në dijeni të këtyre detajeve dhe me veprime aktive dyshohet të ketë vepruar edhe ish- ministri i Brendshëm, Saimir Tahiri, i cili ka siguruar paprekshmërinë e veprimtarisë kriminale të grupit të strukturuar kriminal. E gjithë veprimtaria kriminale mbështetej në bashkëpunimin e grupit kriminal me strukturat e Policisë së Shtetit, ku përfitimet direkte monetare shkonin tek ishministri i Brendshëm, Saimir Tahiri. Në kërkesën që prokuroria i dërgoi Parlamentit shkruheshin edhe 4 rastet kur ishministri i Brendshëm, Saimir Tahiri kishte lëvizur me makinën me targa AA003GB, të cilën ua kishte shitur kushërinjve të tij. "Subjekti në hetim, Saimir Tahiri, më datë 05.11.2013 ka realizuar shitjen e automjetit me targa AA003GB, tek personi në hetim, Artan Habilaj, vëllai i të arrestuarit Moisi Habilaj. Më datë 16.08.2014, 30.08.2014, 29.08.2014, 08.08.2014, personi në hetim Saimir Tahiri udhëton dhe përdor mjetin me targa AA003GB, i cili sipas aktit të shitjes, rezulton të jetë shitur më datë 05.11.2013. Në këto udhëtime rezulton që personi në hetim, Saimir Tahiri, ka qenë i shoqëruar nga subjektet e tjera të dyshuara Artan Habilaj etj.", thuhet në dosje.
HETIMET
- Është kapur dhe sekuestruar një sasi e konsiderueshme lënde narkotike, në masën prej rreth 3.5 tonë e llojit kanabis sativa nga autoritetet italiane të drejtësisë, të dyshuara si të trafikuara nga grupi kriminal Moisi Habilaj etj.
- Më datë 18.10.2017 është kapur dhe sekuestruar një sasi lënde narkotike prej 3.978 tonë ( tre tonë e 978 nëntëqind e shtatëdhjetë e tetë kg), e llojit kanabis sativa, në banesën e shtetasit në hetim, Armand Koçerri, bashkëpunëtor i shtetasve Moisi Habilaj, Florjan Habilaj etj.
- Subjektet e dyshuara, Moisi Habilaj etj., në komunikimet telefonike dhe bisedat ambientale që rezultojnë nga përgjimet e bëra ndërmjet tyre rezulton të pasqyrojnë detaje, të cilat tregojnë përfshirjen në veprimtarinë kriminale të shtetasit në hetim, Saimir Tahiri.
- Subjektet e dyshuara, Moisi Habilaj etj., në komunikimet e bëra ndërmjet tyre rezulton të pasqyrojnë detaje, të cilat tregojnë shpërblimet që i japin ish- ministrit të Brendshëm, Saimir Tahiri në funksion të realizimit të veprimtarisë së tyre.
- Subjekti në hetim, Saimir Tahiri më datë 05.11.2013 ka realizuar shitjen e automjetit me targa AA003GB, tek personi në hetim Artan Habilaj, vëllai i të arrestuarit Moisi Habilaj.
- Më datë 16.08.2014, 30.08.2014, 29.08.2014, 08.08.2014, personi në hetim Saimir Tahiri udhëton dhe përdor mjetin me targa AA003GB, i cili sipas aktit të shitjes, rezulton të jetë shitur më datë 05.11.2013. Në këto udhëtime rezulton që personi në hetim, Saimir Tahiri ka qenë i shoqëruar nga subjektet e tjera të dyshuara, Artan Habilaj, etj..
Nisur nga sa më sipër, në kushtet e sekuestrimit të lëndës narkotike, dhënies së shpërblimeve nga grupi kriminal funksionarëve të lartë zyrtarë, mbajtjes së kontakteve të vazhdueshme me ish- ministrin e Brendshëm, Saimir Tahiri, ekziston një dyshim i arsyeshëm i bazuar në prova për ekzistencën e veprimtarisë kriminale dhe përfshirjes në këtë veprimtari të të dyshuarit Saimir Tahiri.