Prokuroria, kryeministrit: Po na intimidon, nuk do tërhiqemi
Krimet e Rënda: Deklaratat politike nuk do të cenojnë hetimet "Në Kroaci ish- kryeministri u dënua për një orë dore"
Prokuroria e Krimeve të Rënda ka reaguar mëngjesin e djeshëm, pas deklaratave të forta të kryeministrit Edi Rama në mbledhjen e Grupit Parlamentar të PS, ndaj tre prokurorëve për çështjen "Tahiri". Sipas organit të akuzës, marrja e rolit të gjykatësit nga kryeministri bie ndesh me Kushtetutën dhe ligjin. Përmes një deklarate për mediat, Prokuroria për Krimet e Rënda kujton përvojën e Kroacisë dhe Rumanisë ku janë arrestuar dhe dënuar dy ish- kryeministra. Gjithashtu, organi i akuzës thekson se po vijojnë hetimet, si për rastin konkret, ashtu edhe për çështje të tjera të krimit të organizuar dhe grupeve të strukturuara kriminale. "Prokuroria për Krime të Rënda rithekson qëndrimin e saj se deklaratat politike nuk e kanë intimiduar dhe nuk mund ta intimidojnë aktivitetin e saj hetimor. Organi i akuzës e ka të qartë se, që në fillimet e këtij hetimi, do të përballej me goditje frontale politike, për shkak se person nën hetim është ish- ministri i Brendshëm dhe aktualisht deputet i parlamentit të Shqipërisë",- thuhet në deklaratë. "Por,- vijon më tej deklarata,- kjo nuk e pengoi aspak që t'i drejtohej Kuvendit të Shqipërisë me kërkesë për autorizimin për arrestimin e personit nën hetim, pasi, në vlerësimin e prokurorëve të çështjes, ekzistojnë kushtet dhe rrethanat ligjore, për të cilat është e nevojshme të merren ma- sat që parashikon Kodi i Procedurës Penale për rastet e veprave të rënda, si ato të "Trafikut të narkotikëve", kryer në bashkëpunim, në formën e posaçme të grupit të strukturuar kriminal, si edhe "Korrupsionit pasiv të zyrtarëve të lartë"". "Gjithçka çfarë u deklarua publikisht nga Kryeministri i Shqipërisë z. Edi Rama, paraditen e së hënës ( dt. 23.10.2017) shkon në të kundërt të asaj që është deklaruar për dy vite me radhë- Reformën në Sistemin e Drejtësisë. Në fjalën e tij, kryeministri, në cilësinë e kryetarit të subjektit politik, që ai drejton, shprehu opinionin dhe vlerësimin mbi provat e paraqitura në mënyrë sekrete nga ana e Prokurorisë për Krime të Rënda në Këshillin e Mandateve dhe Imuniteteve në parlamentin e Shqipërisë. Pra, në mënyrë publike, Kryeministri mori rolin e gjykatës, një atribut që nuk i takon as me Kushtetutë dhe as me ligj",shprehet prokuroria. "Në vlerësimin tonë, ky qëndrim publik i Kryeministrit është sinjal i qartë që lufta kundër korrupsionit është në nivele të larta, qëllimi i të cilës ishte edhe miratimi i Reformës në Drejtësi",- theksohet në deklaratë. "Prokuroria për Krime të Rënda ka pasur kënaqësinë, disa kohë më parë, të dëgjojë përvojën e homologëve të saj në Kroaci, hetimet e të cilëve, të nisura për një orë dore, përfunduan me arrestimin e më tej, me dënimin e ish- kryeministrit të atij vendi",- përmendet në deklaratë. Gjithashtu, përvoja të ngjashme të suksesshme ka pasur edhe në vende, si Rumania e të tjerë. Prokuroria për Krime të Rënda është e bindur se i gjithë faktori politik shqiptar, i mbështetur edhe nga partnerët më të rëndësishëm ndërkombëtarë, hartuan Reformën në Drejtësi, duke pasur si guidë të suksesshme përvojën kroate e rumune, të cilat i ndihmuan për t'u integruar në Bashkimin Europian. Nëse hetimet e Prokurorisë do të shoqërohen me ndërhyrje flagrante të politikës, atëherë qëllimi i Reformës në Drejtësi për luftën kundër korrupsionit dhe pandëshkueshmërisë në nivele të larta, do të jetë një sfidë, e cila nuk do të përballohet me sukses. Gjithsesi, Prokuroria për Krime të Rënda po vijon hetimet e saj, si për rastin konkret, ashtu edhe për çështje të tjera të krimit të organizuar dhe grupeve të strukturuara kriminale. Deklaratat politike dhe, sidomos presionet indirekte me procesin e vetingut, nuk mund dhe nuk do të mund të cenojnë proceset hetimore".