Pensionistët, deklarim në bankë që e tërheqin vetë pensionin
Emini: 30 mijë pensionistë tërheqin paratë në bankë
Ky është muaji, kur mbi 30 mijë pensionistë duhet të paraqiten vetë në bankë dhe të deklarojnë se e tërhoqën pensionin e tyre. Kjo është një procedurë që bëhet 2 herë në vit. Në rast se nuk paraqitet vetë fizikisht, pensioni nuk kalon në llogaritë përkatëse të individëve. Rreth 30 mijë pensionistë duhet të paraqiten në bankën kur marrin pensionin e tyre për të bërë një deklaratë ku vërtetojnë se janë paraqitur vetë fizikisht për ta tërhequr atë. Kjo është një deklaratë që behet një herë në gjashtë muaj, si procedurë për të vërtetuar se i moshuari jeton. Në rast se nuk bëhet kjo deklaratë, pensionisti humbet të drejtën e përfitimit. "Pensionistët bëjnë një deklaratë, ku deklarojnë se e kanë marrë pensionin në rregull, nuk ka vërejtje dhe pas kësaj deklarate pensioni gjenerohet nga muaji tetor deri në 6 muajt e ardhshëm. Jemi në kushtet kur pensionistët që marrin pensionin në bankë duhet ta kishim bërë këtë deklaratë dhe ka disa prej tyre që, ose duke mos qenë në Shqipëri, ose duke mos e vlerësuar nuk e kanë bërë këtë deklaratë"- thotë Ali Emini për "Ora news". Zv. drejtori i Përgjithshëm i Institutit të Sigurimeve Shoqërore Ali Emini sqaroi të gjithë ata që nuk kanë marrë pensionin suplementar. "Listë pagesat bëheshin në mënyrë manuale dhe dërgoheshin në mënyrë manuale, por tani jemi në kushtet kur shërbimi i pagesës së pensioneve në banka u zgjerua dhe solli domosdoshmërinë e këtij portali. Përveç kësaj, çështja u koordinua dhe me një ditë pushimi që ishte dita e enjte dhe filloi gjenerimi i pagesave ditën e premte"thotë Emini. Për të vazhduar në skemën e përfitimit të ndihmës ekonomike, anëtarët madhorë të familjes duhet paraqiten çdo 3 muaj pranë administratorit shoqëror për të deklaruar lidhur me gjendjen socialekonomike të familjes.