Lista e rimbursimit të barnave ende nuk ka hyrë në fuqi
Specialistët ndërkombëtarë: Të bëhet miratimi mbi baza shkencore, jo mbi opinione Ja 30 medikamentet me rimbursim për 2017
Edhe pse në 1 maj të këtij viti duhet të hynte në fuqi lista e barnave të rimbursuara për 2017- ën, ende po përdoret lista e 2016- ës. Këshilli Administrativ i Fondit bëri me dije se në këtë listë do të shtoheshin 30 medikamente të reja, prej të cilave do të përfitonin një kategori pacientësh. Fokusi i zgjerimit të listës së rimbursimit këtë vit ishte pikërisht tek sëmundjet me përhapje të gjerë në popullatë, sikurse janë sëmundjet e zemrës dhe veshkave. Një vëmendje e veçantë iu kushtua të sëmurëve me tumor, për të cilët u shtuan në listën e rimbursimit barna që shkurtojnë kohën e hospitalizimit të tyre.
Lista e re e barnave me rimbursim mbulon edhe një kategori shumë të ndjeshme, por pak të përfaqësuar në listë, sikurse është ajo e fëmijëve. Konkretisht ishte miratuar që në listë të shtoheshin dy barna antidiabetike, një bar kundër obezitetit, gjashtë barna për kardiologjinë që çojnë trajtimin e pacientit nga monoterapia në kombinime të ndryshme, si dhe katër barna për shërbimin e nefrologjisë. Në listë u përfshin edhe tre barna për onkologjinë si dhe tre barna në doza të ndryshme për shërbimin e Psikiatrisë. Ndërkohë që u rishikuan dhe u pasuruan me ekzaminime edhe një sërë paketash si ajo e dializës e transplantit të veshkës, impiantit koklear si dhe paketat e kardiokirurgjisë, por që nuk u bënë asnjëherë të prekshme për pacientët. Specialistët ndërkombëtarë sugjerojnë që kjo listë të hartohet dhe të miratohet nga ekspertët në baza shkencore dhe jo në bazë të opinioneve për medikamente të caktuara. Në vendin tonë mungon bërja e një analize në vazhdimësi për një bar që është shtuar në listë sa i përket efikasitetit ose rezultateve të dhëna tek pacientët e si rrjedhojë, edhe mbajtja e përgjegjësisë për shumat e shpenzuara për blerjen e këtij medikamenti. Nëse bëjmë një krahasim të shpenzimeve financiare që ka bërë Fondi nga viti 2012- 2016 do të vëmë re se ato kanë ardhur në rritje, por me një vlerë të vogël. Kështu respektivisht ndër vite kemi: në 2012 janë shpenzuar 7.8 milionë lekë, në 2013 - 8.4 milionë, në 2014 - 8.3 milionë, në 2015 - 8.7 milionë dhe në 2016 janë shpenzuar 8.77 milionë lekë për rimbursimin e medikamenteve. Në projektet e saj, Ministria e Shëndetësisë dhe e Mbrojtjes Sociale parashikon që në listën e barnave të rimbursuara për 2018- ën të përfshijë paketën e radioterapisë falas ose të trajtimit me rreze që do t'u bëhet pacientëve edhe në spitalet private, si dhe 5 barna të reja për trajtimin e
kancerit të gjirit. Vendimi për zgjerimin e listës së barnave të rimbursueshme u mor në mbledhjen e Këshillit Administrativ të Fondit
dhe duhej të hynte në fuqi më 1 maj 2017, por aktualisht ende po punohet me listën e barnave të rimbursueshme të vitit 2016.