Lotaria Amerikane, ambasada: Përzgjedhja, tërësisht e rastësishme

Specialistët sqarojnë: Shanset për të fituar, të barabarta për të gjithë "Ne nuk refuzojmë askënd, lexoni kriteret"

Prej 18 tetorit kanë fil luar aplikimet për Lo tarinë Amerikane për të gjithë të interesuarit që dëshirojnë të jetojnë e punojnë në Shtetet e Bashkuara. Në faqen zyrtare të ambasadës, kandidatëve u jepet mundësia për të pyetur në lidhje me çfarëdolloj paqartësie që mund të kenë. Shumë prej aplikantëve kanë dyshime se qyteti i Korçës është ai që fiton më shpesh, por ambasada në një sqarim që ka bërë ditën e djeshme në profilin e saj në "Facebook" shuan çdo dyshim. "Kushdo që beson se mund të kualifikohet, mund të regjistrohet për Lotarinë Amerikane dhe përzgjedhja është tërësisht e rastësishme", - sqaron ambasada. Edhe më parë, Departamenti i Shtetit Amerikan ka bërë me dije se seksioni konsullor apo ambasada nuk kanë asnjë rol në këtë përzgjedhje kompjuterike që bëhet në Kentucky dhe se shanset për të përfituar janë të barabarta si për korçarët, ashtu edhe për çdo shqiptar të lindur në qytetet apo fshatrat e tjera në vend. Çdo aplikuesi i vendoset një numër dhe kompjuteri në Qendrën Konsullore Kentucky përzgjedh numrat, pa asnjë dallim. Më pas shikohen aplikimet që kanë kryer regjistrim më shumë se një herë dhe skualifikohen. Pasi personi rezulton i përzgjedhur dhe i caktohet data e intervistës, është oficeri konsullor që shqyrton çështjen e tij/ saj dhe merr vendimin final për vizën, bazuar në kualifikimin dhe pranueshmërinë për vizë të aplikantit. "Ne ecim në bazë të rregullave dhe ligjeve që i gjeni në faqen tonë të internetit. Ne nuk refuzojmë askënd. Përkundrazi! Ne jemi shumë transparentë në punën tonë, bëjmë fushatë të gjerë sensibilizuese mbi kriteret e kualifikimit dhe gjithmonë kemi rekomanduar që të lexohen rregullat e kualifikimit përpara se të aplikojnë për lotarinë. Shpesh ndodh që nuk lexohen rregullat, nuk na kontaktojnë paraprakisht dhe në sportel kemi në person me arsimin që nuk e kualifikon, apo bën gabime në aplikim, për të cilin jemi të detyruar të zbatojmë ligjin. Dhe ne jemi këtu për të zbatuar ligjin e Shteteve të Bashkuara të Amerikës mbi Imigracionin, edhe pse na vjen keq tek shikojmë që aplikanti refuzohet se nuk ka lexuar rregullat", - sqaron Ambasada Amerikane në profilin e saj në "Facebook".