Taksë 0.05% për 110 mijë ndërtime në proces legalizimi
Arben Ahmetaj: Ja sa do të paguani për ndërtimet para ' 93- shit Detyrimet mbi pronën përfshihen edhe ndërtimet pa leje
Rreth 110 mijë ndërtime pa leje që janë në proces legalizimi do të përfshihen në skemën e taksës e mbi pronën nga 1 janari i vitit të ardhshëm. Taksa do të jetë 0.05% e vlerës së tregut të ndërtimit. Përfshirja në skemën e taksimit për ndërtimet në proces legalizimi është vendosur në paketën fiskale të vitit 2018, e cila ka marrë dje miratimin e Këshillit të Ministrave. "Taksës mbi ndërtesat u nënshtrohen personat që kanë aplikuar për legalizim të ndërtesës, sipas ligjit ' Për legalizimin, urbanizimin dhe integrimin e ndërtimeve pa leje'", - thuhet në projektligjin e miratuar dje. Sipas të dhënave nga ALUIZNI, numri i lejeve për legalizim për periudhën 2006- maj 2017 është 132.000 objekte, nga të cilat 108.240 janë banesa dhe pjesa tjetër 23.760 janë objekte biznesi.
TAKSA MBI NDËRTESËN
"Taksës mbi ndërtesat u nënshtrohen individët, personat fizikë ose juridikë, vendës apo të huaj, pronarë ose përdorues të pasurive të paluajtshme në territorin e Republikës së Shqipërisë, pavarësisht nga niveli i shfrytëzimit të këtyre ndërtesave, përveç rasteve kur në këtë ligj përcaktohen ndryshe. Taksës mbi ndërtesat u nënshtrohen personat që kanë aplikuar për legalizim të ndërtesës, sipas ligjit ' Për legalizimin, urbanizimin dhe integrimin e ndërtimeve pa leje'. Taksës mbi ndërtesat i nënshtrohen zhvilluesit, të cilët nuk arrijnë të mbyllin ndërtimin sipas lejes përkatëse, të lëshuar nga autoriteti i planifikimit. Afati i përllogaritjes së taksës fillon nga momenti i mbarimit të afatit kohor të përcaktuar në aktin e miratimit të kërkesës për leje ndërtimi. Detyrimi për taksën mbi ndërtesat llogaritet si shumëzim i bazës së taksës me shkallën e taksës mbi ndërtesën", - thuhet në nenin 22 të projektligjit për disa shtesa dhe ndryshime në ligjin nr. 92/ 2014, "Për Tatimin mbi Vlerën e Shtuar në Republikën e Shqipërisë", të ndryshuar.
NDËRTIMET PARA VITIT 1993
Ministri i Financave dhe Ekonomisë, Arben Ahmetaj bëri të ditur dje formulën e taksimit për ndërtimet para vitit 1993. Kështu, për individët dhe qytetarët taksa fikse për metër katror do të jetë 0.05 për qind, duke iu referuar ndërtesave para vitit ' 93, ndërsa për sipërmarrjen do të jetë 0.15 për qind. "Taksa e pronës prek të gjithë sistemin. Po kalojmë në fazën e miradministrimit të kësaj takse. Është një taksë fikse për metër katror, për individët dhe qytetarët do të jetë 0.05 për qind sipas ndarjes së udhëzimit numër 9 dhe VKM, që u reformohet vlerave minimale fiskale për shtëpitë e ndërtuara para vitit 1993. Kështu, ata që kanë shtëpi të ndërtuara para vitit ' 93 kanë vlerë më të ulët, ndërsa për sipërmarrjen vlera do të jetë 0.15%. Pra, është ruajtur një raport proporcional mes individit dhe sipërmarrjes", u shpreh Ahmetaj.
SHKALLA E TATIMIT
Shkalla e taksës mbi ndërtesat, e cila aplikohet si për- qindje e bazës së taksës është si më poshtë: 0.05% për ndërtesën që përdoret, shfrytëzohet për banim; 0.15% për ndërtesën që përdoret, shfrytëzohet për veprimtari ekonomike dhe 30% e shkallës së taksës përkatëse për të gjithë sipërfaqen ndërtimore, për të cilën zhvilluesi është pajisur me leje ndërtimi dhe nuk ka arritur ta përfundojë atë sipas afatit të përcaktuar në aktin e miratimit të kërkesës për leje ndërtimi.