Kapet me 2 mina artizanale me telekomandë dhe disa gramë kokainë, në pranga 30- vjeçari
Dyshohej për veprimtari kriminale, nën hetim prej javësh nga oficerët e Krimeve
TIRANË - Një 30- vjeçar nga Librazhdi ka rënë në pranga pasditen e të enjtes nga policia e Tiranës, pasi iu gjetën dy mina me telekomandë, si dhe një sasi e konsiderueshme kokaine. Bëhet fjalë për Taulant Golin, i cili mësohet të ketë qenë nën hetim prej disa javësh nga oficerët e Krimeve të Komisariatit nr. 6, pasi dyshohej për lidhje me veprimtari kriminale dhe me rrezikshmëri të lartë. Sipas policisë Goli ishte një person me prirje radikale dhe kishte krijuar dyshime në lëvizjet e tij, herë pas here ai është parë në zonat periferike të Tiranës. Operacioni për arrestimin e të dyshuarit u organizua ditën e enjte rreth orës 16: 30, pranë një lokali në zonën e Unazës së Re, në Tiranë. Në momentin që Goli ka konstatuar prezencën e policisë, ka tentuar të largohet, por uniformat blu arritën të kapnin në flagrancë të riun. Mësohet se forcat policore kishin marrë informacion se 30vjeçari mbante sende të jashtëligjshme me vete. Pas arrestimit në një çantë që Goli mbante me vete iu gjetën dy bombat me eksploziv C4, të montuara me celular, si dhe disa doza lëndë narkotike e llojit kokainë, me peshë totale rreth 30 gramë dhe dy karta telefoni, të cilat iu sekuestruan në cilësinë e provës materiale.
HETIMI
Taulant Goli dyshohet se është një person me rrezikshmëri të lartë, prej disa javësh oficerët e Krimeve të Komisariatit nr. 6 kishin siguruar informacione operative në lidhje me veprimtarinë kriminale të tij. Dy minat e sekuestruara, të cilat ishin të lidhura me aparat celular për shpërthim në distancë, të përgatitura në mënyrë artizanale me lëndë plasëse ni- trat amoni, dyshohet se do të përdoreshin për ngjarje të rënda kriminale. Një minë e tillë , në tregun kriminal mund ta sigurosh për një shumë që varion nga 3 deri në 4 mijë euro. Pas arrestimit, 30 vjeçari nuk ka pranuar që të flasë për grupin hetimor, duke mos dhënë sqarime se për çfarë do të përdorej lënda plasëse që iu kap në flagrancë. Taulant Goli nga fshati Zdrajsh- Vërri i Librazhdit, akuzohet për veprat penale "Mbajtje pa leje e armëve, bombave apo minave ose lëndëve plasëse" dhe "Prodhim dhe shitje e lëndëve narkotike". in. all