Tatimet: Bizneset që gjenden tri herë radhazi në shkelje, mbyllen

Aksioni anti- informalitet, lëshimi i kuponit tatimor

Administrata

tatimore bën të ditur se po vijon me kontrolle në çdo subjekt që ushtron aktivitet tregtar për zbatimin e ligjit dhe garantimin e kushteve për konkurrencë të ndershme në luftën kundër evazionit dhe informalitetit. Strukturat e zbatimit TaskForcë të Drejtorisë së Hetimit Tatimor kanë ushtruar kontrolle në Tiranë, në zbatim të planit anti- informalitet. Gjatë kontrolleve janë konstatuar problematika për moslëshim të kuponit tatimor, punonjës të padeklaruar apo subjekte të pa licencuara. Janë bllokuar 6 bare dhe restorante për moslëshim kuponi tatimor ( hera e dytë) si dhe dy subjekte tregtare, që ushtronin aktivitet të pa licencuar. Nga 265 kontrolle të realizuara, 80 prej tyre janë penalizuar. Masat ndëshkimore për moslëshimin e kuponit tatimor janë si më poshtë: Moslëshim kuponi hera I: Penalizim me gjobë në masën 50 000 lekë dhe përveç masës së gjobës për tatimpaguesit e regjistruar për TVSH- në, bëhet vlerësim tatimor për tre muajt e fundit. Moslëshim kuponi hera II: Penalizim me gjobë në masën 50 000 ( pesëdhjetë mijë) lekë dhe në këtë rast merret masa e bllokimit të veprimtarisë në vendin ku është konstatuar shkelja për 30 ditë kalendarike. Moslëshim kuponi hera III: Penalizim me gjobë në masën 50 000 lekë dhe konsiderohet evazion tatimor, duke e kallëzuar subjektin penalisht. Gjithashtu, publikohet emri i tatimpaguesit, NIPT- i dhe emri i përfaqësuesit të biznesit në faqen zyrtare të Drejtorisë së Përgjithshme të Tatimeve.