Kanabizimi, Dule: Rama ka vënë në rrezik imazhin e vendit
Kreu i PBDNJ: Kryeministri, problemi me Greqinë
Kreu
i Partisë Bashki mi për të Drejtat e Njeriut, Vangjel Dule në ceremoninë e përvitshme pranë varrezave greke në fshatin Boboshticës të Korçës, tha dje, se marrëdhëniet midis shqiptarëve dhe grekëve janë në nivelet më të larta, por problemi sipas tij është kryeministri Edi Rama. "Duhet të jemi të qetë dhe krenarë për marrëdhëniet qe kemi ngritur në boshtin e tyre mes 2 popujve. Janë marrëdhënie në nivelin më të lartë. Nëse ka një problem midis vendit tonë dhe Greqisë fatkeqësisht ai është vetëm kryeministri i vendit Edi Rama, i cili nuk i shërben axhendës tradicionale të marrëdhënieve midis dy vendeve, por kërkon të imponojë një axhendë që është në diskonkordancë të plotë me ndjenjat dhe dëshirat e popullit shqiptar",- u shpreh dje, Dule. Sipas tij, kjo axhendë "I shërben vetëm agjendës personale dhe ambicies së zotit Rama. Kur popujt kanë gjetur zgjidhjen, nuk ka lidership që mund të dalë mbi të. Është një parantezë e zotit Rama me hijet e tij. Kalimtare do të jetë". I pyetur për akuzat ndaj ish- ministrit të Brendshëm, Saimir Tahiri, Dule u shprehet se ato janë vetëm maja e ajsbergut. "Jemi duke parë vetëm majën e ajsbergut. Kanabizimi i vendit që e denonconim edhe me disa kolegë të tjerë është përtej asaj që edhe ne mendonim se mund të ishte. Me sa duket ishte një projekt kultivimi masiv dhe intensiv dhe kjo nuk mund të bëhet me përgjegjësinë e një ministri. Kjo ka përgjegjës kryesor politik moral vetë kryeministrin Rama, i cili ka venë në rrezik jo vetëm imazhin ndërkombëtar të vendit, por edhe shoqërinë, familjen e individin. E vetmja rrugë mbetet katarsisi i plotë i të gjitha sferave dhe vetëm ai mund ta çlirojë vendin", - tha Dule.