Dosja "Habliaj", mbërrijnë nga Italia 1800 faqe përgjime bisedash
Prokuroria e Krimeve të Rënda pritet të thërrasë përsëri ish- ministrin e Brendshëm Pas vitit 2015 nuk përmendet emri i Tahirit
Dosja me 1800 faqe përgjimesh për grupin kriminal të drejtuar nga Moisi Habilaj, ka mbërritur në prokurorinë shqiptare. Prokuroria e Katanias dhe Antimafias, të cilat dokumentuan veprimtarinë e Habilajve, bën të mundur zbardhjen e përgjimeve mes anëtarëve të bandës. Në to rezulton se pas vitit 2015, emri i ish- ministrit të Brendshëm Saimir Tahiri, nuk përmendet më në bisedat e përgjuara. Periudhë kjo e cila përkon me publikimin e lajmit në Shqipëri, se automjeti "Audi A8" në pronësi të Saimir Tahirit, i është shitur familjarëve Habilaj, duke mos i ndërruar pronësinë. Prokuroria e Krimeve të Rënda pritet të thërrasë për të pyetur përsëri Saimir Tahirin në lidhje me akuzat, të cilat rëndojnë mbi të. Sipas organit të akuzës, janë edhe disa episode të tjera, të cilat ish- ministri duhet të sqarojë në lidhje me përmendjen e emrit të tij në përgjimet e prokurorisë italiane për llogari të dosjes "Habilaj". Ndërkohë edhe autoritetet italiane bëjnë me dije se do të vazhdojnë hetimet për aktivitetin e grupit kriminal, të drejtuar nga vëllezërit Habilaj. Mësohet se mes prokurorisë dhe antimafias italiane janë ngritur disa grupe hetimore të përbashkëta që po hetojnë disa banda të trafikut të kanabisit. Disa ditë më parë Prokuroria e Krimeve të Rënda ka kërkuar nga parlamenti autorizim për heqjen e imunitetit të deputetit Saimir Tahiri, ishministër i Brendshëm, si dhe autorizimin për "arrestimin, heqjen e lirisë dhe kontrollin personal e të banesës". Ndaj tij u ngritën akuzat "Trafikim i lëndëve narkotike" e kryer në bashkëpunim në formën e grupit të strukturuar kriminal dhe "Korrupsion pasiv i funksionarëve të lartë të shtetit". Nga ana tjetër dosja "Habilaj" vijon të jetë në proces nga pala italiane ku mësohet se mes të arrestuarve si pjesëtarë të grupit, mund të ketë edhe persona që do të përfitojnë statusin e bashkëpunëtorit të drejtësisë. Sakaq të premten ish- ministri i Brendshëm u paraqit në Prokurorinë e Krimeve të Rënda, ku për 2 orë e 30 minuta qëndroi përballë prokurorëve Vladimir Mara dhe Dritan Prençi duke sqaruar pozicionin e tij në këtë çështje. I shoqëruar nga avokatët e tij, Maks Haxhia dhe Artan Hajdari, Tahiri dëshmoi për lidhjet e tij me grupin e trafikantëve të drogës, Habilaj. Ai i mohoi akuzat se ka ndihmuar grupin e Habilajve në trafikun e kanabisit dhe hodhi poshtë akuzën për korrupsion.