Zgjedhjet në Maqedoni, dalin rezultatet në komunat që u fituan nga shqiptarët
Nikolla Gruevski: U regjistruan kërcënime, shantazhe dhe blerje të votave Kryeministri Zaev: VMRO- DPMNE të njohin rezultatin
Kanë dalë rezultatet e zgjedhjeve lokale që u mbajtën këtë të diel në Maqedoni. LSDM, sipas rezultateve pas dy raundeve të zgjedhjeve lokale, do të udhëheqë në Shkup dhe 56 komuna, BDI në 10, VMRO- DPMNE në pesë, Aleanca për Shqiptarët në tre, Besa, PDSH dhe PDT në nga një komunë, ndërsa kandidatët e propozuar prej grupeve të votuesve, në tri komuna. Përveçse në Shkup, LSDM dhe koalicioni në raundin e parë të zgjedhjeve më 15 tetor fituan në 37 komuna: Qendër, Gjorçë Petrov, Karposh, Aerodrom, Haraçinë, Berovë, Manastir, Bogdanc, Bosillovë, Vallandovë, Vasilevë, Vevçan, Veles, Gjevgjeli, Debarcë, Dellçevë, Demir Hisar, Dojran, Zelenikovë, Konçe, Koçan, Kratovë, Kriva Pallankë, Krivogashtan, Krushevë, Kumanovë, Lozovë, Mavrovë Rostushe, Negotinë, Novosellë, Ohër, Pehçevë, Prilep, Radovish, Resnjë, Shën Nikollë dhe Strumicë. Në raundin e dytë të zgjedhjeve, LSDM fitoi edhe në 19 komuna: Butel, Gazi Babë, Kisella Vodë, Vinicë, Gradsko, Demir Kapi, Jagunovc, Karbinc, Makedonski Brod, Makedonska Kamenicë, Mogillë, Novaci, Probishtip, Rosoman, Nagoriçan i Vjetër, Çashkë, Çeshinovë Obleshevë, Shtip dhe Shuto Orizare. BDI në raundin e parë zgjedhor fitoi mandate për kryetarë komunash në Kërçovë dhe në Pllasnicë, ndërsa në raundin e dytë edhe në Çair, Tetovë, Saraj, Dibër, Dollnen, Likovë, Tearcë dhe Strugë. Aleanca për Shqiptarët fitoi gjithsej tri mandate për kryetarë komunash, të gjitha në raundin e dytë dhe do të drejtojë komunat Bogovinë, Vrapçisht dhe Gostivar, njofton INA. Besa fitoi në Zhelinë, PDSH në Studeniçan, Partia Demokratike e Turqve në Qendrën e Zhupës, ndërsa kandidatët të cilët u propozuan nga një grup votuesish do të udhëheqin komunat Rankovc, Çuçer Sandevë dhe Bër- venicë. VMRO- DPMNE në raundin e parë fituan në Ilinden, Petrovec dhe Sopishte, ndërsa në të dytin në Zërnovc dhe Kavadar. Reagimi i parë për zgjedhjet lokale të së dielës në Maqedoni ka ardhur nga Partia Bashkimi Demokratik për Integrim, e cila shpalli fitoren në komunat kryesore të banuara nga shqiptarët pas balotazhit të zhvilluar këtë fundjavë. Kreu i saj, Ali Ahmeti tha se në Tetovë rikonfirmohet Teuta Ari, ndërsa kandidatët e partisë së tij udhëheqin bindshëm në Strugë, Çair, Dibër, Saraj, Likovë, Kërçovë dhe të tjera. Ndaj tij reagoi ashpër kreu i Aleancës për Shqiptarët, Ziadin Sela, që akuzoi për manipulime të shumta pasi partia e tij po humbet bastionin e saj, Strugën. Kryeministri i Maqedonisë, Zoran Zaev tha se rezultati i zgjedhjeve lokale tregoi mbështetjen që ka qeveria e tij, duke i bërë thirrje VMRO- DPMNE- së të njohin rezultatin. Por, kreu i opozitës Nikolla Gruevski tha se zgjedhjet shfaqën parregullsi të shumta. "Është shkelur edhe heshtja zgjedhore. Disa persona kanë shpërndarë fletushka dhe policia ka qenë në shërbim të tyre. Janë regjistruar edhe kërcënime, shantazhe dhe blerje e votave". Pjesëmarrja në raundin e dytë llogaritet rreth 52%. Autoritetet thanë se procesi u zhvillua në mënyrë të qetë dhe pa probleme serioze, megjithëse nuk kanë munguar edhe incidentet e vogla.