Rama, Meta e Thaçi, bashkë në Vlorë: Shqiptarët të bashkuar në BE
Kosovë- Shqipëri festojnë Pavarësinë, çelet Viti i Skënderbeut Kryeministri: Nuk u biem daulleve të së shkuarës
Kosova dhe Shqipëria festuan bashkë dje, në Vlorë 105- vjetorin e Pavarësisë. Në prani edhe të dy presidentëve, të Shqipërisë, Ilir Meta dhe të Kosovës, Hashim Thaçi, kryeministri Edi Rama çeli po dje, vitin mbarëkombëtar të Gjergj Kastriot Skënderbeut, duke prezantuar edhe logon zyrtare. Në festimet e Pavarësisë në qytetin e Vlorës mungoi prania e opozitës. Në simbol të aktit të kryer pikërisht 105 vjet më parë nga Ismail Qemali, dje në qytetin e Vlorës u zhvillua ceremonia e ngritjes së Flamurit Kombëtar. Në ceremoni morën pjesë Presidenti i Republikë, Ilir Meta, Presidenti i Kosovës, Hashim Thaçi, kryeministri Edi Rama dhe kryetari i Kuvendit, Gramoz Ruçi si dhe ministrat e kabineteve qeveritare të Shqipërisë e Kosovës. Drejtuesit më të lartë të dy shteteve zhvilluan edhe homazhe në memorialin e Atit të Pavarësisë, Ismail Qemal bej Vlorës. Në fjalën përshëndetëse, kryeministri Edi Rama përmendi aktivitete që do të organizohen për Vitin e Skënderbeut, duke shtuar: "Jo më kot vendimi i parë i qeverisë në këtë mandat ishte shpallja e vitit 2018 si Viti mbarëkombëtar i Skënderbeut. Sepse edhe sot, pas 555 vitesh ai shfaqet si shembulli i forcës së shpirtit luftarak të shqiptarëve. Shqiptarët e patën Skënderbeun një figurë që shënoi ardhmërinë e tyre si komb", tha kryeministri Rama. Kryeministri u shpreh se "Përmes bashkëpunimit më të ngushtë mes dy shteteve tona t'ia dalim së bashku duke reflektuar mbi historinë e lavdishme që Gjergj Kastrioti shtroi pa kthim. Të sigurojmë rrugën e reformave demokratizuese, të sigurisë, të demokracisë të një shteti me të ardhme evropiane". "Krijimi i platformave të përbashkëta ekonomike për diasporën është një detyrë në funksion të rritjes së mirëqenies së qytetarëve tanë",- tha Rama. "Gjithçka do të thuhet e do të bëhet në këtë Vit mbarëkombëtar të Skënderbeut, nuk është asgjëkundi shprehje e një tundimi për t'u kthyer në të shkuarën apo për t'i rënë daulleve të së shkuarës. Por është shprehje e një vetëdijeje se sot përpara ne sh-
qiptarëve është çelur një perspektivë e re dhe së bashku ne kemi detyrimin që për sa kohë e kemi këtë privilegj që të mund të bëjmë si drej-
tues institucionesh apo qeverish e shtetesh, atë që çon një hap më tutje drejt realizimit të kësaj perspektive që është, shqiptarët e bashkuar në BE",- theksoi Rama.
BATUTAT
E ndërsa ai citoi në hyrje të fjalës së tij disa vargje të një poeti të njohur anglez Edmond Spenser, në veprën e tij botuar për Skënderbeun, në 1596, edhe Presidenti Ilir Meta citoi po vargje të një autori të huaj, por amerikan. "Meqenëse kryeministri e nisi fjalën duke iu referuar një poeti anglez, unë po e mbyll në anglisht, duke iu referuar një poeti amerikan, shumë i dashur për mua, por jam i bindur edhe për shumë të tjerë, Longfellou, i cili përshkruan hyrjen fitimtare të Skënderbeut në Krujë me këto vargje: "The city Croia called, The city moated and walled, The city where he was born, - And above it the morning star",- tha Presidenti, ndërsa kryeministri Rama qeshi. Në fjalën e tij, Presidenti Meta u shpreh se, "Viti 2018, Viti mbarëkombëtar i Gjergj Kastriot Skënderbeut, duhet të shërbejë si një reflektim për të kontribuar të gjithë së bashku për lartësimin e imazhit të Shqipërisë dhe shqiptarëve kudo në botë". "Vitit 2018 do të na përbashkojë më fort të gjithëve në Shqipëri, Kosovë dhe kudo në të gjitha trojet etnike, si dhe në diasporë e anembanë botës, për të krijuar një energji të re dhe të fuqishme, ashtu si na e la trashëgim Heroi ynë Kombëtar",- shtoi Meta.