Taksim progresiv për të gjitha llojet e të ardhurave
Drafti, shkalla tatimore, të ardhura 30 mijë deri në 130 mijë lekë, taksimi 13% Për të ardhurat mbi 130 mijë caktohet 23 për qind
Ekspertë të Ministrisë së Financave dhe Fondit Monetar Ndërkombëtar po finalizojnë projektin për ndryshimin e formulës së taksimit mbi të ardhurat. Thelbi i ndryshimit është vendosja e taksimit progresiv mbi të gjithë llojet e të ardhurave. Ndryshme nga modeli aktual, ku taksimi progresiv aplikohet vetëm mbi pagën me skemën e re, ky model do të ndiqet edhe për të ardhurat mbi nga biznesin, dividentin, shitjen e pronës, qiratë, veprimtaritë kulturore dhe sportive, të drejtat e autorit dhe interesi bankar etj. Në projektligjin që do të dalë për miratim së shpejti parashikohet që llojet e të ardhurave të bashkohen në një sistem, e mbi shumën që do të dalë në fund të vendoset tatimi mbi të ardhurat. Sot në mënyrë progresive tatohen vetëm pagat. Me normën 0 taksohen rrogat deri në 30 mijë lekë, 13% ato deri në 130 mijë, dhe 23% për pagat mbi këtë kufi. Mësohet se e njëjta shkallë tatimore do të aplikohet për totalin e të ardhurave që sigurohen. Aktualisht, taksa për qiratë, shpërblimet, kontratat e shërbimit dhe interesat bankare është 15%. Përmes modelit të ri, nëse të ardhurat mujore janë mbi 160 mijë lekë, atëherë pesha e tatimit do të rritet, ndërsa nëse janë nën këtë kufi tatimi do të ulet. Në draftin paraprak që ekspertët e Fondit Monetar kanë dorëzuar në Ministrinë e Financave propozohet që të ardhurat nga puna, biznesi, dividenti, shitja e pronës, qiratë, veprimtaritë kulturore dhe sportive, të drejtat e autorit dhe interesi bankar të llogariten së bashku. Ndryshimi i mënyrës se si do të tatohen të ardhurat personale do të hyjë në fuqi në vitin 2019. Përjashtime do të ketë vetëm për të ardhurat që përfitohen nga sigurimet shoqërore, kompensimet sociale dhe shpërblimet që japin autoritetet shtetërore për shkencën, sportin dhe kulturën.
EFEKTET
Ministri i Financave dhe Ekonomisë, Arben Ahmetaj ka shpjeguar pak ditë më parë efektet që do të ketë për qytetarët ndryshimi i formulës së taksimit mbi të ardhurat. Ministri Arben Ahmetaj shpjegoi se taksimi progresiv mbi të gjitha të ardhurat është shumë i ndershëm dhe përfitojnë shumica e shqiptarëve. Niveli i lartë i këtij taksimi kap një numër të vogël pagash. "Sistemi progresiv ka funksionuar në mënyrë të shkëlqyer dhe ka liruar nga ngarkesa fiskale 97 për qind të të punësuarve në Republikën e Shqipërisë. 23 për qind paguajnë vetëm 1500 veta në Republikën e Shqipërisë. Ta dinë qytetarët. Pra, të nderuar qytetarë, 23 për qind paguajnë 1500 të punësuar që marrin një pagë mbi 4 milionë lekë të vjetra". Por, kundër këtij perceptimi është deputetja e PD, Jorida Tabaku, sipas së cilës, qeveria po varfëron shtresën e mesme, si dhe do të rrisë evazionin në mbledhjen e kësaj takes. "Qeveria është duke shpikur mënyra të reja se si të rrisë të ardhurat nga rritja e taksave. Duke qenë se ka ezauruar të gjitha mundësitë për rritje taksash, duke qenë që kemi nivelin më të lartë të tatimit mbi të ardhurat personale, të ta- timit mbi fitimin në rajon është duke konceptuar mënyra të reja se si mundet që të taksojë sa më shumë qytetarët. Kjo nuk është gjë e re, sepse është një politikë që ka ndodhur gjatë këtyre katër viteve, por kjo do të vazhdojë do të penalizojë akoma edhe më shumë shtresën e mesme, e cila për momentin është shtresa që paguan taksat më të larta
në rajon. Tatimi nga të ardhurat personale është një taksë që ka pasur nën performim të paktën gjatë 4 viteve të fundit dhe ka treguar që rritja e vazhdueshme e taksave nuk prodhon rritje të të ardhurave. Rritja e vazhdueshme e taksave ka prodhuar dhe ka nxitur evazionin". Gjatë diskutimit në Kuvend të buxhetit dhe paketës fiskale të
vitit të ardhshëm, ministri i Financave, Arben Ahmetaj bëri publike idenë e tatimit progresiv të integruar të të ardhurave. Kjo nënkupton se të gjitha të ardhurat e individit ( paga + të ardhurat nga dividenti + të ardhurat nga qiratë si dhe çdo e ardhur tjetër) të tatohen në total në përqindjen e përcaktuar në shkallën e tatimit progresiv.